Դիվերսիաների հնարավորությունն իրոք նվազել է, և հիմա ես ամբողջ պատասխանատվությամբ հայտարարում եմ՝ տեսանելի ապագայում կբացառվեն այլ գործողությունները ևս. Սերժ Սարգսյան
Դիվերսիաների հնարավորության մինիմալիզացումը կապված է այն սարքավորումների տեղադրման հետ, որ հիմա ունենք շփման գծում: «Արմենիա» հեռուստաընկերության «Բանաձև» հաղորդման եթերում այսօր այս մասին ասել է ՀՀ Նախագահ Սերժ Սարգսյանը։
Խոսելով վերջերս Արցախ կատարած այցի, զորավարժությունների ընթացքի, շփման գծում կատարված աշխատանքների, ինչպես նաև Պաշտպանության բանակի առջև այսօր դրված խնդրի մասին, Նախագահը նշել է.
«Ամբողջովին կիսում եմ այն կարծիքը, որ դիվերսիաների հնարավորության մինիմալիզացումը կապված է այն սարքավորումների տեղադրման հետ, որ հիմա ունենք շփման գծում: Եթե հիշում եք՝ տևական ժամանակ առաջ, ես նկատի ունեմ սարքավորումներ տեղադրելուց հետո, երկու-երեք փորձ եղավ, այդ փորձերը ձախողվեցին մեծ կորուստներով, և սա եղավ արդյունքը, որ դիվերսիաներ անցկացնելու հնարավորությունն իրոք նվազել է:
Ինչ վերաբերում է խնդիրներին, ապա հենց անվանման մեջ է մեր խնդիրը՝ պաշտպանական բանակ, այսինքն՝ արդյունավետ իրականացնել մեր արևելյան սահմանների և Լեռնային Ղարաբաղի Հանրապետության սահմանների պաշտպանությունը: Չեմ ուզում մանրամասների մեջ խորանալ, բայց հավատացած եղեք, որ մենք ունենք կոնկրետ ծրագրեր, որ կբացառեն այլ գործողություններ ևս: Երբ մենք ասում էինք, որ ծրագիր ունենք և դիվերսիաները կբացառվեն, շատերը նորից ասում էին, համենայնդեպս կասկած էին հայտնում։ Հիմա ես ամբողջ պատասխանատվությամբ հայտարարում եմ՝ տեսանելի ապագայում կբացառվեն այլ գործողությունները ևս»:
Նախագահն անդրադարձավ նաև բանակը բարեփոխելու 7-ամյա ծրագրին, ինչպես նաև բանակում ամենամեծ կոռուպցիոն կծիկը բացահայտած իր բարեփոխումներից մեկի` զորակոչիկների զորակոչման և զորացրման օրերի վերաբերյալ հրամանագրի մասով լրագրողի դիտարկմանը.
«Բանակը մշտապես բարեփոխվել է, համալրվել է նոր սպառազինությամբ, կառուցվածքային փոփոխություններ են տեղի ունեցել, բայց մենք մի քանի ամիս հետո ապրելու ենք մի երկրում, որտեղ ամբողջովին փոխվում է կառավարման համակարգը, և այդ կառավարման համակարգին համահունչ նախ փոփոխություններ պետք է տեղի ունենան Զինված ուժերում, որ անցումը լինի շատ-շատ հարթ: Սա մեկ, որ շատ կարևոր է: Երկրորդ, միշտ չէ, որ մենք հնարավորություն ենք ունեցել բարեփոխումների երկարաժամկետ ծրագրեր հաստատել: Միշտ էլ Զինված ուժերն իր աշխատանքը պլանավորել է մեկ, երկու, երեք տարով, երբ կառավարությունը սկսեց միջնաժամկետ ծրագրեր քննարկել, բայց հիմա մենք մի կողմից հնարավորություն ունենք ավելի երկարաժամկետ պլանավորելու բարեփոխումները, մյուս կողմից դա ուղղակի անհրաժեշտ է՝ մենք պետք է տեսնենք, թե յոթ տարի հետո ինչ ունակություններ ենք ունենալու և ելնենք ոչ թե նրանից, թե ինչ միջոցներ կարող ենք դնել, այլ՝ ինչ միջոցներ են անհրաժեշտ: Փիլիսոփայությունն է մի քիչ փոխվում:
Ի պատասխան լրագրողի դիտարկմանը, թե սովորաբար երկարաժամկետ ծրագրեր չեն հայտարարվում, իսկ ընդունված ամենահայտնի արտահայտություններից է այն, թե տեսնենք վաղը մեր գլխին ինչ է գալիս, Նախագահը նշել է.
«Բայց մենք՝ որպես պետություն, գնալով հասունանում ենք, հասունանում ենք որպես զինված ուժեր: Ակնհայտ է, որ բանակը շատ տևական ժամանակ բավարարվել է նրանով, ինչ հատկացրել ենք բանակին։ Ես կարծում եմ, որ մեզ մի փուլ պետք է, որպեսզի մի քիչ ավելին անենք բանակի համար: Եվ դրա հնարավորությունները կան»: