Նորմալ պայմաններում որևէ մեկի մտքով չէր անցնի, որ 3 միլիոնանոց ժողովուրդն ունենար այսպիսի Զինուժ, բայց արդյո՞ք մենք կամավոր ենք այս ճանապարհն ընտրել. Նախագահը` Global Military–ի գնահատականի մասին
2016 թվականի ապրիլն էլ ցույց տվեց, որ մենք մեզ ավելորդություններ թույլ չենք տվել և ավելորդ բաներ չունենք: «Արմենիա» հեռուստաընկերության «Բանաձև» հաղորդման եթերում այսօր այս մասին ասել է ՀՀ նախագահ Սերժ Սարգսյանը` անդրադառնալով BICC–ի գնահատականին` ըստ որի ՀՀ-ն աշխարհի 3-րդ ամենառազմականացված երկիրն է։
Պատասխանելով Արտակ Ալեքսանյանի հարցին` արդյոք մեզ չի՞ մտահագում, որ դառնում ենք բանակ-պետություն, Նախագահը նշել է.
«Ոչ, իհարկե չի մտահոգում: Նախ, իհարկե, դա մեր թերությունն է, իշխանությունների թերությունն է, որ այդպիսի տեղեկություններ հայտնվելուն պես մենք բացատրական աշխատանքներ չենք կատարում: Գիտեք, այդպիսի ռեյտինգները, այդպիսի չափորոշիչները միշտ յուրահատուկ են և առաջին հայացքից ստեղծվող տպավորությանը չհամապատասխանող: Ի՞նչ նկատի ունեմ: Դուք ասում եք՝ ռազմականացված պետություն: Առաջին տպավորությունը, կարծում եմ, այն է, որ փողոցում տանկ կա, և եթե նույնիսկ տանկ չկա, ապա պետությունն ընդհանրապես ռազմականացված է, քաղաքացիական իրավունքները սահմանափակված են, և այլն։ Փառք Աստծո, որևէ մեկը դա չի կարող ասել: Այ այդ ռեյտինգը որոշվել է մի քանի չափորոշիչներով, օրինակ՝ բնակչության մեկ շնչին ընկնող ծանր տեխնիկայի թվով: Դե դա մի քիչ այլ բան է, քան ռազմականացվածը, գոնե մեր պատկերացումներում:
Իհարկե, նորմալ պայմաններում որևէ մեկի մտքով չէր անցնի, որ 3 միլիոնանոց ժողովուրդն ունենար այսպիսի Զինված ուժեր, բայց արդյո՞ք մենք կամավոր ենք այս ճանապարհն ընտրում։ Մենք պարտադրվա՛ծ ենք դա անել. մի կողմից մեզ մեղադրում են, թե իբր մենք ավելի թույլ ենք ռազմականապես, քան Ադրբեջանը, մյուս կողմ ասում են՝ ռազմականացված եք: Հիմա ինչպե՞ս հասկանանք՝ որն է ոսկե միջինը: Մենք ուղղակի պարտադրված ենք ունենալ այն նվազագույնը, որը հնարավորություն կտա լուծել մեր անվտանգության խնդիրները, ուղղակի պարտադրված ենք: 2016 թվականի ապրիլն էլ ցույց տվեց, որ մենք մեզ ավելորդություններ թույլ չենք տվել և ավելորդ բաներ չունենք»: