Ահաբեկչության դեմ պայքարն ավարտված կլինի այն ժամանակ, երբ Սիրիայում չմնա գեթ մեկ ահաբեկիչ. Ասադ
Սիրիայի նախագահ Բաշար ալ Ասադը հայտարարել է, որ երկրում պատերազմն ավարտված կարելի կլինի համարել միայն այն ժամանակ, երբ Սիրիայում չմնա գեթ մեկ ահաբեկիչ՝ ցանկացած ահաբեկչական խմբավորումից։ Ըստ նրա՝ հակառակ դեպքում իրատեսական չէ խոսել ահաբեկչության դեմ տարած հաղթանակի մասին, փոխանցում է RT հեռուստաալիքը:
«Ահաբեկչությունը չի սահմանափակվում միայն «Իսլամական պետություն» ահաբեկչական խմբավորմամբ: ԻՊ-ն ահաբեկչության միայն մի մասն է: Քանի դեռ կան այնպիսի ահաբեկչական խմբավորումներ, ինչպես «Ջեբհաթ ան-Նուսրան» ու այլ անվանումներով խմբավորումներ՝ նշանակում է մենք դեռ պատերազմի մեջ ենք», - ասել է Ասադը՝ շեշտելով, որ ԻՊ-ի դեմ տարած հաղթանակն, անշուշտ, մեծ ձեռքբերում է:
Հիշեցնենք, որ նոյեմբերի 3-ին սիրիական բանակն ամբողջովին ազատագրել է Դեր Զորը, որը համարվում էր ԻՊ-ի վերջին խոշոր հենակետը Սիրիայում: