Հայաստանում պոտենցիալ արտագաղթի ցուցանիշները բավական բարձր են, բնակչության 38 տոկոսը հնարավորության դեպքում հենց այսօր էլ կգնար. սոցիոլոգ
Դեկտեմբերի 18-ը Միգրանտների միջազգային օրն է: ՄԱԿ-ի գլխավոր ասամբլեայի կողմից օրվա ընտրությունը պայմանավորված է նրանով, որ 1990թ. այս օրն ընդունվել է «Բոլոր միգրանտ աշխատողների և նրանց ընտանիքների անդամների իրավունքների պաշտպանության» ՄԱԿ-ի կոնվենցիան:
Ըստ ՄԱԿ-ի տվյալների՝ միջազգային միգրանտների թիվը 2050 թվականին կարող է հասնել 405 միլիոնի, եթե պահպանվեն վերջին քսան տարիների միգրացիայի աճի տեմպերը:
Ինչպիսին է իրավիճակը Հայաստանում: ԱՎԾ տվյալներով, հունվարի 1-ի դրությամբ ՀՀ մշտական բնակչության թվաքանակի ցուցանիշը կազմել է 2 986.1 հազ.մարդ և 2016թ. տարեսկզբի համեմատ այն նվազել է 12.4 հազ.մարդով, որը ձևավորվել է հաշվետու ժամանակաշրջանում արձանագրված բնակչության բնական հավելաճի և միգրացիայի մնացորդի տարբերությամբ:
2016-ին, ըստ ԱՎԾ-ի տվյալների, մենք ունեցել ենք 24 հազար արտագաղթած մարդ: Եթե դա չլիներ, ապա կունենայինք բնական հավելաճ, քանի որ 12 500 մարդ 2016-ին ավել է ծնվել, քան մահացել: Բայց արտագաղթի հետևանքով ստացվել է բնակչության թվի նվազում 12 500-ով:
Սոցիոլոգ Ահարոն Ադիբեկյանի խոսքով` հանրային կարծիքի հետազոտությունների ընթացքում իրենք ներառում են արտագաղթին առնչվող հարցեր, մասնավորապես, դրսում ունե՞ն ազգականներ, ստանո՞ւմ են փոստային գումարներ, թե՞ ոչ, և ինչպես են վերաբերվում արտագաղթին:
«Մեզ մոտ պոտենցիալ արտագաղթի ցուցանիշները բավականին բարձր են, ընդ որում` 38 տոկոսը հենց այսօր էլ, եթե ունենար հնարավորություն, գումար, այնքան, որ կարողանար դրսում տեղավորվել, կգնար»,-ասաց Ադիբեկյանը։
Արտագաղթի հիմնական պատճառները, ըստ սոցիոլոգի, աշխատատեղերի բացակայությունն է, գործազրկությունը, և երեխաների ապագան Հայաստանում չտեսնելը:
«Ուսանողների 75 տոկոսը, երեք քառորդն ուղղորդված է արտասահման գնալուն: Մենք պետք է գոնե հինգ միլիոն լինեինք, բայց իջել ենք երեք միլիոն բնակչության:
Եթե ոչինչ չփոխվի, առաջնային աշխատատեղեր չբացվեն, արտագաղթի ծավալներն ավելանալու են: Մարդը գնում է Ռուսաստան, կարողանում է իր գլուխը պահել»,-ասաց Ադիբեկյանը:
Սոցիոլոգի խոսքով` արտագաղթի հիմնական ուղղությունը շարունակում է մնալ ՌԴ-ն՝ 90 տոկոսն արտագաղթում է Ռուսաստանի Դաշնության երկրներ, և միայն 10-13 տոկոսը միասին վերցրած արտագաղթում է եվրոպական երկրներ և ԱՄՆ:
Ադիբեկյանը հատկապես մատնանշեց երկրում ՓՄՁ գործունեության վատթարացումը: Հայաստանից, սոցիոլոգի խոսքով, գնում է սպառող մասը:
«Հիմա, որ Երևանով պտտվեք, միջինից բարձր մակարդակի բոլոր խանութները կա՛մ փակ են, կա՛մ դնում են զեղչեր մինչև 70 տոկոս: Պաշտոնապես բնակչության 30 տոկոսն աղքատ է, որը նվազագույն սպառողական զամբյուղը չի ապահովում: Դա մոտ 60 հազար դրամի է հաշվարկված Հայաստանում: Մեր տվյալներով` 10 տոկոսը խիստ աղքատ է, սննդի հետ խնդիրներ ունի, ևս 40 տոկոսը մի կերպ կարողանում է գոնե սննդի հարցը լուծել, 10- 15 տոկոսն է, որ ոչ մի պրոբլեմ չունի»,- եզրափակեց սոցիոլոգը: