Ադրբեջանա-իսրայելական ԱԹՍ-ների փորձարկումը, հաշվի առնելով արտոնագրի սառեցումը, հարցականներ է առաջացնում. փորձագետ
Միգուցե Ադրբեջանում փորձարկում են իսրայելական ընկերության արտադրության թռչող 1-2 անօդաչու՝ կումուլյատիվ մարտական մասով, բայց այն չի կարող համատարած լինել, քանի որ դրանք արտադրող ընկերության արտահանման արտոնագիրը սառեցված է: Այս մասին Tert.am –ին հայտնեց ադրբեջանագետ, ռազմական փորձագետ Տարոն Հովհաննիսյանը:
«Ադրբեջանում այս անօդաչու սարքերի հավաքման մասին դեռևս 2 տարի առաջ էր հայտնի։ Իրականում, խոսքը կումուլյատիվ մարտական մասով անօդաչու թռչող սարքերի մասին է, որոնք պետք է որ նախատեսված լինեն զրահատեխնիկայի ոչնչացման համար, ոչ թե կենդանի ուժի, բայց ակնհայտ է, որ այս գործընթացում որոշակի բարդություններ կան: Ընկերությունը դատական գործընթացներով է անցնում, ֆինանսական կորուստներ ունի, իսկ նշված համակարգի սարքերը հենց այդ արտադրության սարք է, որը տեսականորեն պետք է հավաքեին նաև Ադրբեջանում: Հետահաբար, դժվար է ասել՝ այդ սարքը, երբ կկարողանան հավաքել, որովհետև դա նա նույն Orbiter =1 K տեսակի սարքի կումուլյատիվ մարտական մասի տարբերակն է, իսկ Իսրայելի պաշտպանության նախարարությունը ներկայում սառեցրել է այդ տեսակի սարքեր արտադրող «Աէրոնավտքիս դեֆենս սիստեմս» ընկերության արտահանման արտոնագիրը: Այնպես որ, շատ ուզելու դեպքում էլ մինչև հետաքննության ավարտը տեսականորեն պետք է, որ չկարողանան այդ անօդաչուները արտադրել և մատակարարել իրենց Զինված ուժերին: Այսինքն՝ նախ այդ խնդիրը պետք է լուծվի, որից հետո միայն հնարավոր կլինի հասկանալ, թե ինչ ժամկետներում հնարավոր կլինի այդ սարքերը արտադրել»,-ասաց նա
Հիշեցնենք, որ Aeronautics-ի շուրջ, հիշեցնենք, սկանդալ էր ծագել, երբ կասկածներ էին առաջացել, որ ընկերության ներկայացուցիչները իրենց արտադրած Orbiter 1K հարվածային անօդաչու սարքերը Ադրբեջանին վաճառելու նպատակով համաձայնել են դրանց փորձարկում իրականացնել մարտական պայմաններում` հայկական դիրքերի ուղղությամբ, և ինչպես հայտնել էր իսրայելական ոստիկանությունը՝ հետաքննում է ինչպես այդ միջադեպը, այնպես էլ Իսրայելի պաշտպանության նախարարի գործողությունները:
Հարցին, թե այսինքն՝ ստո՞ւմ են Ադրբեջանում՝ նշելով, որ սկսված է անօդաչուների փորձարկումը, փորձագետը պատասխանեց՝ ասելով. «Չեմ ասում՝ ստում են, հնարավոր է՝ 1-2 տարբերակ փորձարկեն, բայց քանի որ արտոնագիրը սառեցված է, իրենք պետք է որ դրա արտադրության և այդ սարքով Զինված ուժերին զինելու արտոնագիր պետք է ,որ չունենան, որովհետև դա նույնպես արտոնագրի համաձայն է կատարվում, իսկ այս հարցը, նորից եմ կրկնում, հետաքննվում է»:
Ինչ վերաբերում է այս անօդաչու թռչող սարքի կիրառմանը, ապա այս անօդաչուն, ըստ ռազմական փորձագետի, դեռ չի երևացել կիրառման մեջ, ուստիև՝ բարդ է կանխատեսել, թե ինչպես կգործի, և ենթադրաբար՝ այն զրահատեխնիկայի դեմ պայքարի համար է:
Նույն նյութում նշվում էր նաև, որ նախագծերից մեկը 23 միլիմետր տրամաչափի դիպուկահար հրացանի ստեղծումն է, որի հեռահարությունը կազմում է 3 հազար մետր:
Տարոն Հովհաննիսյանը, մեջբերելով ադրբեջանական լրատվամիջոցի հաղորդած տեղեկությունը, որ այս ուղղությամբ բանակցում են Թուրքիայի հետ, հետևաբար, կարելի է ենթադրել 23 միլիմետրանոց դիպուկահար հրացանի ստեղծման աշխատանքները դեռ մի քանի տարի կտևեն։: Եվ նաև հարց է՝ կստացվի, թե ոչ: Իսկ այլ՝ շատ ավելի փոքր տրամաչափի դիպուկահար հրացանների արտադրություն, Տարոն Հովհաննիսյանի տեղեկացմամբ, Ադրբեջանն արդեն ունի։