Կարծում եմ՝ Ալիևի հայտարարությունն իրականությանը չի համապատասխանում․ ՀՀ-ում Սիրիայի դեսպանը՝ հայերի՝ մուսուլմանների բարեկամ չլինելու մասին
Հայաստանի Հանրապետությունում Սիրիայի Արաբական Հանրապետության արտակարգ և լիազոր դեսպան Մուհամմադ Ահմադ Հաջ Իբրահիմի խոսքով՝ ինքը տեղյակ չէ Ադրբեջանի նախագահ Իլհամ Ալիևի հայտարարությունից, ըստ որի հայերը չեն կարող լինել մուսուլմանների բարեկամները: Սակայն Tert.am-ի հետ զրույցում նա նշեց, որ իր համոզմամբ՝ հայերը պատմական հարաբերություններ ունեն արաբների և մուսուլմանների հետ:
«Ես կարող եմ խոսել Սիրիայի անունից․ հայերը կազմում են Սիրիայի հասարակության անքակտելի մասը, և նրանք միմյանցից վերցրել են սովորույթները, ավանդույթները: Հայերը, որոնք գտնվում են արաբական 11 երկրներում, օրինակ՝ Լիբանան, Իրաք, Հորդանան, Եգիպտոս և այլն, միշտ եղել են և մնում են համատեղ ապրելու համերաշխության վառ օրինակ: Նրանք միշտ եղել են դրական տարր այն հասարակություններում, որտեղ ապրել են, և ես կարծում եմ, որ այդ հայտարարությունն իրականությանը չի համապատասխանում»,- ասաց նա:
Հիշեցնենք, որ Երուսաղեմի շուրջ եղած իրադարձությունների ֆոնին Ստամբուլում տեղի ունեցած Իսլամական համագործակցության կազմակերպության արտահերթ գագաթնաժողովին Ադրբեջանի առաջնորդը իր ելույթի մեծ մասը նվիրել է ղարաբաղյան հակամարտության թեմային՝ Երուսաղեմի հարցով հավաքված մահմեդական առաջնորդներին հիշեցնելով, որ «Հայաստանը օկուպացրել է Լեռնային Ղարաբաղն ու հարակից հինգ շրջանները», և որ «Հայաստանը չի կատարում ՄԱԿ-ի Անվտանգության խորհրդի բանաձևերը»: Ադրբեջանի ղեկավարը նաև նշել է, որ հայերը չեն կարող լինել մահմեդականների բարեկամները:
Մուհամմադ Ահմադ Հաջ Իբրահիմը նաև խոսեց Երուսաղեմի վերաբերյալ իրենց դիրքորոշման մասին: «Ինչպես մեր լեզուն, արաբական լեզուն համարվում է մեր ինքնությունն ու մեր պատմությունը, նույնպես և Երուսաղեմը համարվում է մեզ՝ արաբներիս համար մեր պատմությունն ու ինքնությունը: Երուսաղեմը Պաղեստինի մայրաքաղաքն է»,- ասաց նա: