Սանկտ Պետերբուրգում ահաբեկչության հետևանքով կարող էին զոհվել հարյուրավոր, նույնիսկ՝ հազարավոր մարդիկ. Թրամփ
ԱՄՆ նախագահ Դոնալդ Թրամփը հայտարարել է, որ Ռուսաստանի Սանկտ Պետերբուրգ քաղաքում ահաբեկչության կանխումն ԱՄՆ-ի ու ՌԴ-ի միջև ահաբեկչության դեմ համատեղ պայքարի լավագույն օրինակն է։ Ըստ նրա՝ հենց այդպես պետք է աշխատեն տարբեր երկրներն ահաբեկչության դեմ համատեղ պայքարի շրջանակում, գրում РИА Новости գործակալությունը:
«Երեկ ես հեռախոսազանգ ստացա Ռուսաստանի նախագահ Վլադիմիր Պուտինից, որը շնորհակալություն հայտնեց մեր երկրին Կենտրոնական հետախուզական վարչության կողմից փոխանցված հետախուզական տվյալների համար, որը կապված էր Սանկտ Պետերբուրգում պլանավորված հարձակման հետ: Այդ հարձակման հետևանքով կարող էին զոհվել հարյուրավոր, նույնիսկ՝ հազարավոր մարդիկ», - ասել է Թրամփը:
Հիշեցնենք, որ կիրակի ՌԴ նախագահը շնորհակալություն է հայտնել Թրամփին տեղեկության փոխանցման համար, որն օգնել է հայտնաբերել և ձերբակալել հանցախմբին, որը նախապատրաստվում էր ահաբեկչություն իրականացնել Սանկտ Պետերբուրգի Կազանի Աստվածամոր տաճարում և այլ մարդաշատ վայրերում:
Օրեր առաջ էլ Թրամփն էր զանգահարել Պուտինին և շնորհակալություն հայտնել դեկտեմբերի 14-ին կայացած տարեվերջյան մեծ մամուլի ասուլիսի ժամանակ ԱՄՆ տնտեսական բարձր ցուցանիշների մասին փաստելու համար: