Պարի խմբի ղեկավարը մեղադրվում է անօրինական միգրացիայի կազմակերպման մեջ
«Վահրամաբերդ» պարի խմբի ղեկավարը մեղադրվում է անօրինական միգրացիայի կազմակերպման մեջ:
Tert.am-ը Դատական տեղեկատվական համակարգից տեղեկացավ, որ գործն ուղարկվել է Կենտրոն և Նորք-Մարաշ վարչական շրջանների ընդհանուր իրավասության դատարան և մակագրվել դատավոր Մնացական Մարտիրոսյանին:
Արա Գեղեցիկ Մելիքսեթյանին մեղադրանք է առաջադրվել այն բանի համար, որ նա 2016թ. հունվարին «Ա. Շաբոյան» պարի խմբի գեղարվեստական ղեկավար Արմեն Շաբյանից տեղեկանալով, որ նույն թվականի մարտի 17-20-ն ընկած ժամանակահատվածում Ֆրանսիայում տեղի է ունենալու պարի միջազգային փառատոն, պայմանավորվածություն է ձեռք բերել վերջինիս հետ` իր ղեկավարած «Վահրամաբերդ» պարի խումբը «Ա. Շաբոյան» պարի խմբին միացնելու և «Վահրամաբերդ» պարի խմբի անվան տակ նշված փառատոնին մասնակցելու վերաբերյալ:
Այնուհետև, նախնական համաձայնության գալով Արմեն Շաբոյանի հետ նյութական օգուտ ստանալու և նյութական որոշակի ծախսերից ազատվելու ձգտումով, «Վահրամաբերդ» պարի խմբի անդամ չհանդիսացող ՀՀ 9 քաղաքացիների, որոնցից` Նաիրա Մկրտչյանից պահանջել և ստացել է 380 եվրո, Գևորգ Մարտիրոսյանից` 300 եվրո, իսկ Լուսինե և Ջեմմա Գյոլեցյաններից յուրաքանչյուրից` 200-ական եվրո, որը հետագայում փոխանցել է Արմեն Շաբոյանին:
Արա Գեղեցիկ Մելիքսեթյանին մեղադրանք է առաջադրվել ՀՀ ՔՕ-ի 329.1 հոդվածի 3-րդ մասի 1-ին և 2-րդ մասի հատկանիշներով: Նրա նկատմամբ խափանման միջոց է ընտրվել ստորագրություն չհեռանալու մասին: