«Նոյ» թաղամասը ոչ թե կխթանի տուրիզմը դեպի Գյումրի կամ Սյունիք, այլ հակառակ էֆեկտը կունենա. կարծիքներ
Դալմայի նախկին այգիների փոխարեն Հայաստանի զարգացման հիմնադրամի միջոցով 4 ընկերություններ «Նոյ» թաղամասի իրենց տարբերակները կներկայացնեն՝դրանք արդեն Հայաստանի զարգացման հիմնադրամի կայքում են: Ըստ հեղինակների՝ միտքն այն է, որ մի տեղում լինի մի կտոր Շիրակ, Սյունիք և այլն, ինչը կնպաստի տուրիզմի զարգացմանը դեպի այլ մարզեր:
Ծրագրի մասին հայտարարել է վարչապետ Կարեն Կարապետյանը, նախնական գնահատմամբ՝ ծրագիրը շուրջ 150 միլիոն դոլարի ներդրումով կլինի:
Հայաստանի զարգացման հիմնադրամի կայքում տեսնում ենք, որ գործադիր տնօրեն Արմեն Ավակ Ավակյանն ծրագրի հիմքում այն է, որ Երևան այցելող զբոսաշրջիկը թաղամասով կծանոթանա Գորիսի կամ Լոռվա կոլորիտին, ինչը կշահագրգռի այցելել նաև մարզեր ու ավելին տեսնել:
Սակայն այս ծրագիրը հասարակության որոշ հատվածի մոտ դժգոհություն է առաջացրել, այն քննադատվեց նաև սոցիալական ցանցերում: Tert.am-ը հարցի հետ կապված զրուցեց Շիրակից ընտրված պատգամավորների հետ: Նրանց կարծիքով՝ ծրագիրը կարող է հակառակ էֆեկտն ունենալ, ավելին՝ գտնում են, որ սա հերթական միջոցն է ամեն ինչ Երևանում կենտրոնացնելու:
ԱԺ «Ծառուկյան» խմբակցություն պատգամավոր Վարդան Ղուկասյանը շեշտեց, թե Հայաստանում այնքան հուշարձան չկա, որքան Գյումրի քաղաքում, որտեղ 1700 հուշարձան կա՝ հնությունն էլ պահպանված:
«Կողմնակից եմ, որ Երևանում ոչ թե 150 մլն դոլարանոց թաղամաս կառուցեն, այլ եղածը պահպանեն, քանի որ ՀՀ-ում այդքան հուշարձան չկա, դրանք պետք է վերականգնվի: Ինչ մնում է Երևան-Գյումրի ճանապարհին, եթե ճանապարհը վերջնական տեսքի բերեն, կես ժամ հետո մարդ կարող է լինել Գյումրիում: Ես դրան եմ կողմնակից, որ Երևանը չուռճացնեն ու մարզերի հավասար զարգացում լինի»,- ասաց նա:
Ղուկասյանը շեշտեց, որ այսօր էլ տուրիստական կազմակերպությունները Գյումրի չեն գալիս.«Ինչի՞ հիմա գնում են Գյումրի, հավանական է, որ տուրիզմն էլ շատ լուրջ ձեռքի մեջ է: Տուրիստական կազմակերպությունները Գյումրի չեն գալիս, կենտրոնացված է մայրաքաղաքում: Հավանական է՝ ՀՀ մտած տուրիստների 0.1 տոկոս էլ Գյումրի չի գալիս: Հիմա, այո, ծրագրեր արվում են վարչապետի աջակցությամբ, բայց դրանով քաղաք չես պահի»,- շարունակեց Վարդան Ղուկասյանը:
Գյումրեցի պատգամավորը կողմնակից է նրան, որ «Նոյ» թաղամասի կառուցման ուղղված գումարներով վերակառուցվի Գյումրին, Վանաձորն, Էջմիածինը և այլն, որովհետև մայրաքաղաքի հետ տարբերությունը շատ է:
Նույն կարծիքն ունի նաև «Ծառուկյան» խմբակցության պատգամավոր, գյումրեցի Վարդևան Գրիգորյանը: Նրա համար էլ ծրագրի իրականցման հիմքում դրված Կառավարության փաստարկները համոզիչ չեն:
«Կառավարությունը համոզիչ հաշվարկներ չի ներկայացրել: Ինչ-որ տեղ փոքր Սյունիք, Գյումրի, իսկ մեր երկրում այս երկու տարածքն է, որ ունի պատմաճարտարապետական լուրջ շինություններ, նույնիսկ ավելի շատ, քան Երևանը: Օրինակ՝ Գյումրի կումայրոց արգելոցը, որը հիմա ուզում են վերածել տուրիզմի կենտրոնի»,- շեշտեց Վարդևան Գրիգորյանը:
Վերջինս, թերահավատորեն է մոտենում Կառավարության այն գաղափարի իրականացմանը, թե Նոյ թաղամասը զբոսաշրջիկի համար այցեքարտ կլինի Գյումրի կամ Սյունիք այցելելու համար:
«Տուրիստական ընկերություններն իրենց պայմանագրերում այդ երթուղիները պետք է դնեն, թե չէ հույս դնենք, որ տուրիստն այդ թաղամաս գալով կցանկանա նաև Գյումրի գալ, շատ քիչ հավանական է»,-եզրափակեց Վարդևան Գրիգորյանը:
Tert.am-ը խոսեց նաև տուրիստական գործակալությունների հետ, որոնք թեև չցանկացան, որ իրենց անունը հրապարակվի, միևնույն է, նշեցին, որ աշխարհում նման փորձ կա, սակայն ՀՀ-ում դժվար են պատկերացնում դրա իրականացումը՝ հաշվի առնելով ճանապարհների վիճակը, հանրային սպասարկման ենթակառուցվածքները: