Դատական համակարգի բարեփոխումն անհրաժեշտություն է, դա օրվա հրամայականն է. Գևորգ Կոստանյան
Դատական համակարգի բարեփոխումն անհրաժեշտություն է: Tert.am-ի հետ զրույցում ասաց ԱԺ ՀՀԿ խմբակցության պատգամավոր, նախկին գլխավոր դատախազ Գևորգ Կոստանյանը՝ խոսելով Հայաստան-Եվրամիություն համագործակցության նոր համաձայնագրով դատաիրավական ոլորտում նախատեսված բարեփոխումների մասին:
Հարցին՝ հավատո՞ւմ եք, որ այդ բարեփոխումները համաձայնագրի ստորագրման արդյունքում կյանքի կկոչվեն, Կոստանյանը պատասխանեց. «Ոչ թե հավատում եմ, որ այդ համաձայնագրի արդյունքում կլինեն դատաիրավական բարեփոխումներ, այլ ես վստահ եմ: Երկրի դատական համակարգի առաջընթացը արդյունավետությունը ինքնին երաշխիք է երկրի առաջընթացին կամ երկրի գոյությանը: Եթե երկրում արդարադատությունը չլինի պատշաճ մակարդակի, չենք ունենա ոչ տնտեսություն, ոչ սոցիալական արդարություն, ոչ այլ երաշխիքներ մարդու իրավունքների պաշտպանության համար»:
Նա նշեց, որ դատական համակարգի բարեփոխումն անհրաժեշտություն է, դա օրվա հրամայականն է, առանց դրա անհնար է պատկերացնել որևէ առաջընթաց որևէ ոլորտում:
Համաձայնագրի շրջանակներում իրականացվող բարեփոխումները, նրա խոսքով, արդեն իսկ սկզբունքորեն ստանձնել են և առաջիկայում քննարկվելու են Ազգային ժողովում:
Դիտարկմանը, թե Ազգային ժողովում Քրեական օրենսգիրքն է քննարկվում, բայց շատ քիչ թվով պատգամավորներ են մասնակցում քննարկմանը, արդյոք սա ցուցանիշ չէ՞, որ նոր Սահմանադրությամբ ԱԺ-ին վերապահված գործառույթները դեռ լիարժեք չեն կարևորվում խորհրդարանի կողմից, Գևորգ Կոստանյանն այսպես արձագանքեց. «Նիստերին դահլիճում ներկա գտնվելը կամ չգտնվելը դեռ չի նշանակում խորհրդարանական անգործություն: Նիստերին մասնակցելը պառլամենտական գործունեության միայն մեկ բաղադրատարրն է, բայց դա չի նշանակում, որ պատգամավորը դահլիճում չգտնվելով զերծ է մնում այս գործունեությունից: Ես նիստերին մասնակցելը չափանիշ չէի համարի»: