Հայաստանի որոշ խոշոր համայնքերում դեմ են մարդու պապիլոմա վիրուսի դեմ պատվաստմանը
Հայաստանի տարբեր մարզերի որոշ խոշոր համայնքերում դեմ են առողջապահության նախարարության նախաձեռնած մարդու պապիլոմա վիրուսի դեմ պատվաստմանը:
Շիրակ մարզի Ախուրյան համայնքի ղեկավար Արծրունի Իգիթյանը Tert.am-ի հետ զրույցում ասաց, որ հաշվի առնելով նախկին պատվաստումների փորձը, համայնքում բացասաբար են տրամադրված «Գարդասիլ» պատվաստանյութով պատվաստման դեմ:
«Բնակչությունը լուրջ չի պատկերացնում, թե այս պատվաստման ազդեցությունը ինչպիսին կլինի, բայց ընդհանրապես պատվաստումների հետ կապված բացասական դիրքորոշում կա: Սրանից մի քանի տարի առաջ նորից ինչ-որ պատվաստում էին անում, որից հետո խնդիրներ ի հայտ եկան, և բոլորը նշում էին, որ պատվաստումն էր պատճառը: Հիմա նախորդ պատվաստումներին տեղի ունեցած դեպքերից հետո այս պատվաստման հետ էլ է որոշակի բացասական վերաբերմունք է առաջացել»,- նշեց Արծրունի Իգիթյանը:
Պապիլոմա վիրուսի դեմ պատվաստմանը դեմ է նաև Արագածոտնի մարզի ամենախոշոր համայնքներից մեկի՝ Արագածավանի բնակչության մեծամասնությունը: Համայնքի ղեկավար Անդրանիկ Պապիկյանի խոսքով՝ բոլոր պատվաստումները կյանքի բնականոն ընթացքից շեղում են:
«Սա բնականոն ընթացքից շեղում է, բնությունը մարդուն ինչպես ստեղծել է մարդն այդպես էլ պետք է մահանա: Մեկ առաջարկում են սրսկել, մեկ ալյուրի հետ չգիտեմ ինչ խառնել: Ես դեմ եմ այս պատվաստմանը, նաև համայնքում են դեմ»,- ասաց նա:
Նշենք, որ առողջապահության նախարարությունը նախաձեռնել է Մարդու պապիլոմա վիրուսի դեմ պատվաստումներ: Նախնական տվյալներով՝ այս տարվա դեկտեմբերին «Գարդասիլ» պատվաստանյութով պատվաստելու են 13 տարեկան աղջիկներին՝ արգանդի վզիկի քաղցկեղը կանխարգելելու համար, այլ կերպ ասած` պատվաստում մարդու «պապիլոմա» վիրուսի դեմ։
«Գարդասիլ» պատվաստանյութի բացասական հետևանքները բուռն քննարկումների պատճառ են դարձել Հայաստանում։ Շատ քաղաքացիների և մասնագետների կարծիքով՝ դեղամիջոցը կարող է անպտղություն առաջացնել կանանց մոտ: «Գարդասիլ» պատվաստանյութը կարող է ունենալ ձվարանների վաղաժամ անբավարարություն առաջացնող հետևանքներ:
Ի տարբերություն Շիրակի և Արագածոտնի մարզերի խոշոր համայնքների, պապիլոմա վիրուսի դեմ պատվաստմանը նորմալ են վերաբերում Լոռու մարզի Գուգարք համայնքում. «Մեզ մոտ այդ պատվաստմանը դեմ չեն, դրան հանգիստ են վերաբերվում»,- ասաց համայնքի ղեկավար Աշոտ Աշուղյանը:
Իսկ Գեղարքունիք և ամբողջ Հանրապետության ամենամեծ համայնքի՝ Վարդենիկի համայնքի ղեկավար Հովհաննես Հովեյանն էլ խուսափեց պատասխանել, թե ինչպիսի տրամադրություններ են համայնքում «Գարդասիլի» պատվաստման հետ կապված. «Ես մասնագետ չեմ, չեմ կարող ոչինչ ասել»,- ասաց նա: