Կարագի ներմուծումը Հայաստան արգելված չէ, 2018-ին և 2019-ին մաքսատուրքի դրույքաչափը կբարձրանա. ՊԵԿ
Դեկտեմբերի 13-ին ՀՀ Բավրա սահմանային անցակետում Վրաստանից Հայաստան եկող քաղաքացիներին հարցնում էին, թե կարագ տեղափոխո՞ւմ են, թե՞ ոչ:
Այս առնչությամբ Tert.am-ը պարզաբանում է խնդրել ՀՀ ԿԱ Պետական եկամուտների կոմիտեից, թե արդյոք կարագ ներմուծելը Հայաստան արգելվում է, թե ոչ, և ոչ առևտրային նպատակով որքան կարագ կարող է բերվել Հայաստան:
Tert.am-ի հարցին ի պատասխան ՊԵԿ-ից պատասխանել են, որ կարագի ներմուծումը Հայաստանի Հանրապետություն արգելված չէ:
«Արտաքին տնտեսական գործունեությամբ զբաղվող տնտեսավարող սուբյեկտների կողմից ներմուծվող կարագի ամբողջ քանակությունը հարկվում է մաքսատուրքով և ԱԱՀ-ով:
Ֆիզիկական անձինք առանց մաքսատուրքի վճարման կարող են ներմուծել մինչև 30 կգ կարագ: Նշված չափաքանակը գերազանցող յուրաքանչյուր կիլոգրամի, որպես անձնական օգտագործման ապրանք ներմուծելու համար «Մաքսային միության մաքսային սահմանով ֆիզիկական անձանց կողմից անձնական օգտագործման նպատակով ապրանքների տեղափոխման և դրանց բացթողման հետ կապված մաքսային գործառնություններ իրականացնելու կարգի մասին» համաձայնագրի հավելված 5-ով սահմանված է 4 եվրոյին համարժեք միասնական վճարի գանձում:
Ոչ անձնական օգտագործման նպատակով կարագի ներմուծման մաքսատուրքի դրույքաչափը մինչև 2017թ. ավարտը 10% է, 2018թ.-ին կլինի 11%, իսկ 2019թ.-ին` 13%»,-ասվում է ՊԵԿ-ի պատասխանում:
ՊԵԿ-ից նաև տեղեկացրել են, որ կարագ ներմուծելու համար անհրաժեշտ են հետևյալ փաստաթղթերը. հայտարարագիրը և Մաքսային միության մաքսային օրենսգրքի 183-րդ հոդվածով նախատեսված փաստաթղթերը (հայտարարագրված տվյալները հավաստող փաստաթղթեր), սննդի անվտանգության հավաստագիր: