Յուրաքանչյուր խնդիր, որ կա պետությունում, վաղ թե ուշ վերաբերում է բոլորին. Դավիթ Պետրոսյան (տեսանյութ)
«Հանուն գիտության զարգացման» նախաձեռնության անդամ, հացադուլ հայտարարած Դավիթ Պետրոսյանը ֆեյսբուքյան իր էջում ուղիղ եթերի շրջանակներում նշում է, որ յուրաքանչյուր խնդիր, որ կա պետությունում, վաղ թե ուշ վերաբերում է բոլորին:
Նա նշեց, որ բացի անարդյունավետ կառավարումից, առկա է սոցիալական խնդիր, մենք չունենք միջին խավ, կա բարիքների անհավասար բաշխում, աղքատություն: «Մի քանի մարդ կա, որոնց ձեռքում կենտրոնացված է հիմանական հարստությունը և չի զարգանում քաղաքական միտքը, հասարակական ակտիվություն: Մենք չպետք է մոռանանք, որ ազգի մեջ խնդիր չունենք: Պատահական չէ, որ հայերը գնալով այլ երկրներ, դառնում են այնտեղի լավ քաղաքացիներ, նրանց փորձում այնտեղ պահել, քանի որ հայը նվիրվող է, աշխատող է»,-ասաց նա և սեփական երկրում նույնը չլինելու գլխավոր խնդիրը համարեց կրթությունը, սոցիալիզացիան:
«Յուրաքանչյուր անձ պետք է պատասխանատվություն զգա իր համայնքի, երկրի համար: Եթե պատասխանատվություն զգում ենք միայն փոքր շրջանակի համար, շատ շուտ չենք կարողանալու այդ պատասխանատվությունը կրել և թողնելու ենք գնանք: Պատասխանատվություն պետք է զգանք այն երկրի համար, որտեղ ապրում ենք, այնտեղ որտեղ սովորում ենք, որտեղ աշխատում ենք, դրանից հետո հնարավոր է մեզ մոտ տեղի ունենան փոփոխություններ»,-ասաց նա: