ՄԱԿ-ի՝ երջանկության զեկույցը հիմարություն է. նրանց ցուցիչները երջանկությունը չեն բնորոշում. հոգեբան
ՄԱԿ-ն օրերս հրապարակել է «Երջանկության համաշխարհային զեկույցը», որտեղ Հայաստանը 156 երկրից 122-րդ հորիզոնականում է` «ոչ երջանիկ երկրների շարքում: Հայաստանն այս ցուցանիշով տարածաշրջանի երկրների ցուցակում երկրորդ երկիրն է՝ առաջ լինելով միայն Վրաստանից, որը 126-րդն է: Իսկ տարածաշրջանի մյուս երկրները ավելի բարվոք դիրքերում են՝ Թուրքիան 70-րդ հորիզոնականում է, Ադրբեջանը՝ 86-րդ, Իրանը՝ 109-րդ: Հատկապես հանրության շրջանում քննարկման առիթ է դարձել այն փաստը, որ Հայաստանը իր դիրքով զիջում է նաև 94-րդ և 114-րդ հորիզոնականներում հայտնված Սոմալիին և Մոզամբիկին:
Ըստ ՄԱԿ-ի զեկույցի՝ հաշվի է առնվել 6 չափորոշիչ՝ համախառն ազգային արդյունք, առողջ կյանքի տևողություն, սոցիալական աջակցություն, վստահություն, սեփական կյանքի վերաբերյալ որոշումներ կայացնելու ազատություն, սոցիալական նվիրվածություն:
Հոգեբան Սամվել Խուդոյանի խոսքով՝ երջանկությունը շատ վերացական բան է և այն ցուցիչները, որոնք առանձնացրել են ՄԱԿ-ի ներկայացուցիչները, դրանք երջանկությունը չեն բնորոշում:
«Այս տվյալները հիմարություն են: Մեկ անձի չափով ՀՆԱ-ի չափը ոչ մի կապ չունի, մարդը կարող է երջանիկ լինել բացարձակ աղքատ վիճակում և դժբախտ՝ հարուստ վիճակում: Կամ կյանքի տևողությունը երջանկության հետ ի՞նչ կապ ունի, մեզ մոտ կյանքի տևողությունը քիչ է, որովհետև բժշկությունը թույլ է, ծխողները Հայաստանում շատ են և այլն: Սա ամեն ինչը բնութագրում է, բացի երջանկությունից»,- նշեց նա:
Ըստ նրա՝ այս 6 չափորոշիչներով զեկույց հրապարակելը մեթոդոլոգիական տեսանկյունից կատարյալ անգրագիտություն է։ «Սրա վրա ոչ միայն հիմնվել պետք չէ, այլև պետք է կատարյալ անգրագիտություն համարել և պահանջել հետզոտություն իրականացնողներին ընդհանրապես ազատել աշխատանքից»,- ընդգծեց հոգեբանը:
Նույն «Երջանկության համաշխարհային զեկույցի» համաձայն ամենաերջանիկ երկրներն են Նորվեգիան, Դանիան, Իսլանդիան, մինչդեռ Սամվել Խուդոյանը նկատում է՝ սրանք այն երկրներն են, որտեղ դեպրեսիան շատ տարածված է. «Հյուսիսային երկրներում դեպրեսիան սարսափելի տարածված է, ինքնասպանություններն են այստեղ շատ, աբսուրդ է ուղղակի»:
Հոգեբանը բերում է «Gallup» վիճակագրական կառույցի՝ երջանկության հարցի վերաբերյալ տվյալները, ըստ որի՝ Հայաստանը երջանիկ երկրների շարքում է: Հարցումն անցկացվել է 66 հազար մարդու շրջանում: Հարցման արդյունքներով՝ Հայաստանի բնակչության 53 տոկոսն իրեն երջանիկ է համարում, 41 տոկոսը չեզոք պատասխան է տվել, 6 տոկոսը՝ ոչ երջանիկ: «Gallup»-ի վարկանիշում Հայաստանը 35-րդ տեղն է զբաղեցրել աշխարհում:
«Այս տվյալներով լրիվ այլ պատկեր է ստացվում, այստեղ հարցրել են՝ Դուք ձեզ երջանի՞կ եք զգում: Երջանկությունը սուբյեկտիվ բան է, և կարծում եմ՝ այսպիսի մոտեցումը ավելի ճիշտ է: Ամեն մարդու համար երջանկությունը մի բան է, մեկի համար հարստությունն է երջանկությունը, մյուսի համար սերը»,- ասաց նա:
Նույն «Gallup»-ի տվյալներով՝ ամենաերջանիկ երկիրը Կոլումբիան է, նրան հաջորդում են Ֆիջին և Սաուդյան Արաբիան։ «Տեսնո՞ւմ եք, այստեղ ընդհանրապես չկան սկանդինավյան երկրները»,- նկատեց Սամվել Խուդոյանը: