Ոչ մի քաղաքացի չի տուժելու, բայց փոխհատուցում նախատեսված չէ. պաշտոնյան` ՀՀ–ում աջ ղեկով ավտոմեքենաների վաճառքի սահմանափակման մասին
2018-ի ապրիլի 1-ից ժամանակավորապես աջակողմյան ղեկային տեղաբաշխմամբ տրանսպորտային միջոցների ներմուծումը Հայաստան արգելելու և այդ տրանսպորտային միջոցների վերահաշվառումը սահմանափակելու վերաբերյալ նախագծերը դեռևս քննարկման փուլում են: Այս մասին Tert.am-ը զրույցում ասաց ՀՀ Տրանսպորտի և կապի նախարարության տրանսպորտի վարչության պետի տեղակալ Դավիթ Մելքոնյանը: Ըստ պաշտոնյանի՝ աջ ղեկով ավտոմեքենա ունեցող ոչ մի քաղաքացի չի տուժելու, բայց փոխհատուցում նախատեսված չէ։
- Կներկայացնե՞ք, թե ինչ է ենթադրում տրանսպորտային միջոցների վերահաշվառումը սահմանափակելու վերաբերյալ դրույթը, արդյոք դրանով արգելվելու է աջակողմյան ղեկով մեքենաների վաճառքը ներսում:
- Նախ ասեմ, որ սրանք դեռևս նախագծեր են, որոնք ներկայումս քննարկվում են շահագրգիռ պետական կառավարման մարմիններում և նաև դրված է հասարակության հետ քննարկման: Վերջնական տարբերակը կլինի, երբ որ կառավարությանը կներկայացվի որոշման նախագիծ: Ինչ վերաբերում է հաշվառում իրականացնելու սահմանափակմանը, ապա այն միտված է, որ ներմուծման հետ զուգահեռաբար հաշվառումը բացառվի: Այսինքն` մենք արգելքում ենք աջակողմյան տրանսպորտային միջոցների ներմուծումը` նկատի ունենալով, որ Հայաստանի Հանրապետության երթևեկությունն աջակողմյան է: Աջակողմյան մեքենաներ հնարավոր է վաճառել համապատասխան թույլտվությամբ: Ճանապարհային ոստիկանությունը տալիս է վերասարքավորման թույլտվություն, այսինքն` ղեկը փոխելուց հետո հնարավոր է վաճառել:
-Եթե աջակողմյան մեքենան արդեն ներկրված է և շահագործվում է, իմաստը որն է վաճառքի արգելք սահմանել։
-Դա միտված է նրան, որ արդեն աջակողմյան ղեկային համակարգով մեծ թվաքանակի տրանսպորտային միջոցներ են Հայաստանում շահագործվում և չեն պահպանվում ՀՀ-ում ճանապարհային երթևեկության անվտանգությունը:
- Միևնույնն է այդ մեքենաների կոնկրետ թվաքանակ կա և մեքենայի տերն է փոխվում, ոչ թե պակասում կամ ավելանում է մեքենաների թվաքանակը:
-Կրկնում եմ, որ սրանք նախագծեր են, որոնք քննարկման փուլում են:
-Եթե դրանք նախագծեր են, որոնք դեռ քննարկվում են, այդ դեպքում ԵԱՏՄ-ի պահանջը, հնարավոր համարո՞ւմ եք, որ քննարկումներից հետո քաղաքացիների դեմ լինելու արդյունքում փոխվի: Այսինքն՝ չկատարենք, հակառակ գործենք:
- Իհարկե նախագծերը յուրաքանչյուր դեպքում հնարավոր է ինչ-որ փուլում ենթարկվեն փոփոխության, ես այսօր մեկնաբանում եմ այն նախագծերը, որոնք շրջանառվում են: Եթե որևէ բան հակասում է ԵԱՏՄ պահանջներին, ապա համապատասխան ընթացակարգեր կան, նախատեսված անցումային շրջաններ: Մենք ԵԱՏՄ-ին հակառակ չենք կարող գործել:
-Այդ դեպքում ի՞նչն է հնարավոր փոխել նախագծերում:
-Նախագծերում հիմնական սկզբունքներն են արձանագրված, ոչ բոլոր դրույթներն են ԵԱՏՄ-ով նախատեսված:
-Իսկ հաշվառման սահմանափակումը դա այն սկզբունքնե՞րն են, որոնք փոփոխության ենթակա չեն:
- Դրանք հիմնականում մեր երկրում և ընդհանրապես ամբողջ աշխարհի պրակտիկայից ելնելով սկզբունքներն են, որով մենք նախաձեռնել ենք փոփոխություններ:
- Ո՞վ է պատասխանատու, եթե այդ քաղաքացիները տուժեն այս փոփոխությունից և ֆինանսական կորուստ կրեն:
- Ի սկբզբանե ոչ մի քաղաքացի չի տուժելու, մեր գործողություններն ուղղված չեն լինելու որևէ քաղաքացու օրինական շահերը ոտնահարելուն:
-Այսինքն՝ փոխհատուցում նախատեսելո՞ւ եք:
-Փոխհատուցում նախատեսված չէ, բայց որևէ քաղաքացու շահ չի անտեսվելու:
-Ինչպես չի տուժելու, եթե որևէ մեկը աջ ղեկով մեքենա ունի, սակայն ուզում է այն վաճառել և չի կարող մինչև ղեկը չփոխի, ինչը հավելյալ ծախս է նրա համար:
- Դա ըստ այսօրվա նախագծի, քննարկման արդյունքներում կնայենք վերջնական տարբերակը: Յուրաքանչյուր հարց ենթակա է փոփոխության, մինչև ՀՀ կառավարության կողմից համապատասխան որոշման ընդունումը: Մեզ համար առաջնային և կարևորը քաղաքացիների անվտանգությունն է: Մենք դեռևս այդ հարցերը քննարկում ենք, երբ որ հստակ որոշում կլինի, այդ մասին կասենք:
- Տեսակետ կա, որ անվտանգության նկատառումներով ղեկի փոփոխությունն ավելի ռիսկային է, դուք մասնագիտական վերլուծություն ունեք այդ առումով:
- Դա աշխարհի փորձն է և այն երկրներում, որտեղ աջակողմյան երթևեկություն է տրանսպորտային միջոցները պետք է լինեն ձախակողմյան, հակառակ դեպքում կունենանք քաոսային իրավիճակ: Դրա համար մենք արգելում ենք ընդհանրապես աջակողմյան ղեկային տրանսպորտային միջոցների ներկրում` անկախ նրանից փոխված է, թե ոչ:
-Չե՞ք անհանգստանում, որ այդ որոշումները կարող են առաջացնել քաղաքացիների դժգոհությունը, ինչը կհանգեցնի բողոքի ակցիաների:
- Բոլորի հետ քննարկում ենք, հետևաբար բողոքի ացկիա, կամ բողոքի տեղիք երբևիցե չենք տալիս: Իհարկե, ամեն ինչ հնարավոր է կանխատեսել, բայց մենք բաց քննարկումներ ենք իրականացնում, կարծիքներ լսում ենք և դա վերջնական տարբերակը չէ: