Թե՛ նախորդ տարիներին, թե՛ այս տարի Ամանորին ՀՀ մարզերի հյուրանոցները 100%-ով զբաղեցված են. Ա. Նազարյան
Ե՛վ նախորդ տարիներին, և՛ այս տարի Հայաստանի մարզերի հյուրանոցները 100 %-ով զբաղեցված են: Tert.am-ի հետ զրույցում այս մասին ասաց «Արմհոթելզ» ընկերության տնօրեն Աշոտ Նազարյանը:
«Շատի և քչի համեմատական դնելը հնարավոր չէ, որովհետև որպես կանոն Ամանորին Երևանից դուրս մարզերի հյուրանոցները 100%-ով զբաղեցվում են: Այդպես է և՛ վերջին տարիներին, և՛ այս տարի: Հիմանական սպառողը մեր ներքին շուկան է, բացառությամբ Ծաղկաձորի, որտեղ գալիս են ռուսական շուկայից»,- նշեց նա:
Աշոտ Նազարյանը նաև հայտնեց, որ Երևանի մասով էլ այս տարի ակտիվություն նկատվում է, բայց ավելի շատ պարսկական շուկայից:
Զբոսաշրջության պետական կոմիտեի պետի տեղակալ Մեխակ Ապրեսյանի խոսքով՝ արտասահմանյան բազմաթիվ ամրագրման կայքերի տվյալներ և հրապարակումներ կան, որ Հայաստանը, Երևանը բավականին գրավիչ է զբոսաշրջիկների համար: Նա նկատեց, որ Հայաստան նախընտրում են գալ և Ամանորն այստեղ անցկացնել ոչ միայն ռուսները, իրանցիները, այլ նաև եվրոպացիները:
«Ավելի հստակ տվյալներ կունենանք երբ այս ժամանակահատվածն անցնի և տվյալները ամփոփենք: Մենք ընթացիկ տվյալներ չենք ունենում, հաշվետու ժամանակահատվածից հետո տվյալներ կունենանք, թե ինչ պատկեր ունեցանք»,- ասաց Մեխակ Ապրեսյանը:
Նրա տեղեկացմամբ՝ այսօր Հայաստանի հանգստավայրերում հետաքրքիր ու տարբերակված առաջարկներ կան ամանորյա փաթեթների տեսքով, և դրանցից օգտվողներն էլ բավականին շատ են: Ինչ վերաբերում է մատչելիությանը, Զբոսաշրջության պետական կոմիտեի պետի տեղակալը նշեց, որ շատ լայն գնային առաջարկներ կան՝ 3-4 օրը 90-ից 200 հազար և ավելի դրամի սահմաններում:
«Օրինակ, շատ հետաքրքիր առաջարկ կա Գյումրիում՝ 3 գիշեր 4 օրը ամանորյա փաթեթով, որի մեջ մտնում է ամանորյա միջոցառում, օրերի ընթացքում երեքանգամյա սնունդ և այլն, այս ամենը մեկ անձի համար 93 հազար դրամ արժե»,- հայտնեց նա:
Մեխակ Ապրեսյան խոսքով՝ զբոսաշրջիկների համար շատ լավ պայմաններ են ստեղծվել ինչպես Երևանում, այնպես էլ մարզերում և Արցախում: Ըստ նրա՝ ՀՀ-ում և Արցախում նախատեսված են հետաքրքիր միջոցառումներ, համերգային ծրագրեր և այլն:
«Դուք տեսնում եք՝ Երևանն ինչ գեղեցիկ պատրաստված սպասում է հյուրերին: Հայաստանը և Արցախը պատրաստ են դիմավորելու հյուրերին և համոզված ենք, որ Հայաստանում Ամանորը դիմավորող շատ զբոսաշրջիկներ կունենանք: Ինչն է կարևոր, մենք նախ պետք է ապահովենք ծառայությունների բարձր որակ, ինչը կարծես թե մեզ մոտ ստացվում է և լավ միջոցառումներ ունենանք: Իհարկե, նաև մեր լեգենդար հյուրընկալությունն ու հյուրասիրությունը ցույց տանք, որ զբոսաշրջիկը մեզ մոտ միշտ ընդունված զգա և հաջորդ անգամ էլ ցանկանա գալ»,- ասաց Մեխակ Ապրեսյանը: