Զինհաշմանդամների վերականգնողական կենտրոնի բացումից հետո այլևս կարիք չի լինի արտերկրում բուժվել. հունվարի 29-ին կենտրոնը շահագործման կհանձնվի
Հունվարի 29-ին Մխիթար Հերացու անվան պետական բժշկական համալսարանի «Հերացի» թիվ 1 համալսարանական հիվանդանոցում կբացվի «Զինվորական հաշմանդամների վերականգնողական կենտրոնը»: Այս մասին Tert.am-ի հետ զրույցում ասաց ԵՊԲՀ աշխատակազմի ղեկավարի տեղակալ Շուշան Դանիելյանը:
Զինվորական հաշմանդամների վերականգնողական կենտրոնի ստեղծման գաղափարը ծագել էր ապրիլյան պատերազմից հետո, երբ անհրաժեշտություն էր առաջացել մարտական գործողությունների ժամանակ վիրավորված զինվորների բուժումը կազմակերպել արտերկրում, քանի որ Հայաստանում գործող վերականգնողական կենտրոնները համապատասխան հագեցվածություն չունեին:
Շուշան Դանիելյանի տեղեկացմամբ՝ նոր կենտրոնն արդեն հագեցած է լինելու գերժամանակակից վերականգնողական սարքերով և իր հնարավորություններով միակն է լինելու տարածաշրջանում: Զինհաշմանդամների վերականգնողական կենտրոնում բուժման շնորհիվ հնարավոր կլինի խուսափել բազմաթիվ խնդիրներից, ապահովել առավել լիարժեք ապաքինում, իսկ որոշ դեպքերում անգամ կանխել հաշմանդամություն ունենալու ռիսկը:
«Մինչ այժմ կատարվել են շենքի ամբողջական ամրացման աշխատանքները, այս պահին կահավորման և ներքին հարդարման աշխատանքներ են կատարվում: Շենքը բաղկացած է 4 հարկից, որի առաջին հարկում տեղակայված է լինելու ջրային միջամտությունների համար նախատեսված ծառայությունները՝ լողավազանները և մարզասարքերը: Երկրորդ հարկում լինելու են մասնագետների սենյակները, ուսումնական սենյակները և գերժամանակակից սարքերի սրահը»,- հայտնեց նա:
Իսկ 3-րդ և 4-րդ հարկերում լինելու են 40 հոգու համար նախատեսված հիվանդասենյակներ: Բայց ամբուլատոր բուժումն արդեն կկարողանան ավելի շատ զինծառայողների ստանալ:
Կենտրոնի կառուցմանը ֆինանսավորմամբ աջակցել են ՀՀ Նախագահը, պաշտպանության նախարարությունը, Ազգային ժողովը, քաղաքապետարանը, բազմաթիվ անհատներ, բժշկական հանրությունը և բարերարներ:
«Կենտրոնը լինելու է ամբողջական վերականգնողական համալիր, առողջական խնդիրներից բացի լուծվելու են նաև զինհաշմանդամություն ունեցողների սոցիալական ինտեգրման, կրթության և աշխատանքի հարցերը: Այսինքն` վերականգնողական կենտրոնը իրականացնելու է ոչ միայն բուժական աշխատանքներ, այլև այստեղ լուծվելու է զինվորների սոցիալիզացիայի խնդիրը»,- նշեց ԵՊԲՀ աշխատակազմի ղեկավարի տեղակալը:
Նա վստահեցրեց, որ վերականգնողական կենտրոնի շահագործումից հետո այլևս կարիք չի լինի արտերկրում վերականգնողական բուժումն իրականացնել: Շուշան Դանիելյանի խոսքով՝ վերականգնողական կենտրոնի հնարավորություններով զինհաշմանդամություն ունեցողները կկարողանան նույն որակի անվճար լիարժեք վերականգնողական բուժում ստանալ:
«Որպես կանոն վիրավորում ստացած զինծառայողները նախկինում վերականգնողական բուժման հետ կապված խնդիրներ էին առաջանում և եղան շատ դեպքեր, որ սկսեցին արտերկրում կազմակերպել նրանց բուժումը: Իսկ վերականգնողական բուժման համար հսկայական գումարներ էր պահանջվում: Օրինակ, Ռուսաստանում վերականգնողական բուժման մեկ օրվա արժեքը միջինում 400 եվրոյի է հասնում, իսկ Եվրոպայում ընդհուպ մինչև 1000 եվրո: Այժմ հենց Հայաստանում հնարավոր կլինի վերականգնողական բուժում իրականացնել, բայց արդեն անվճար»,- հայտնեց նա: