Աջ ղեկով մեքենաների ներմուծման արգելքից հետո նույն գնով ավելի վատ որակի մեքենաներ են ներկրվելու. ներմուծող ընկերության տնօրեն
Բնական է՝ դեմ եմ օրինագծին, պայքարին միանում եմ այլ տարբերակներով. Tert.am-ի հետ զրույցում ասաց «Jcars» ավտոմեքենա ներմուծող ընկերության տնօրեն Վարդան Մկրտչյանը՝ անդրադառնալով կառավարության կողմից հաստատված աջ ղեկային կառավարման համակարգ ունեցող մեքենաների հաշվառումն ու շահագործումը 2018-ի ապրիլի 1-ից արգելող նախագծին:
Հիշեցնենք, որ երեկ Tert.am-ի հետ զրույցում նախագծի դեմ պայքարող «Աջ ղեկ» նախաձեռնության համակարգող Գևորգ Աճեմյանը նշել էր, որ իրենք պայքարը կշարունակեն այն դեպքում, երբ ներմուծողները կպայքարեն, քանի որ իրենց հիմնական պահանջներից մեկն արդեն իրականացել է՝ աջ ղեկով մեքենաների վերահաշվառման արգելքը հանվել է:
Ներմուծող ընկերության տնօրենն էլ Tert.am-ին ասաց, որ ակցիաներին ֆիզիկապես ներկա լինելու հնարավորություն թեև չի ունեցել երկրում չգտնվելու պատճառով, բայց միացել է նախաձեռնության բողոքին այլ տարբերակներով՝ հարցազրույցներ, նամակներ:
«Բնական է՝ պայքարելու ենք, չենք համակերպվելու: Կմիանամ նախաձեռնությանը և միասին կքննարկենք ավելի լուրջ, ավելի ռացիոնալ տարբերակներ»,-ասաց նա:
Վարդան Մկրտչյանը նշում է, որ օրենքի ընդունումը, բնականաբար, բացասաբար է ազդելու իրենց գործունեության վրա որպես ներմուծող ընկերություն, իսկ հիմնավորումը, որ աջ ղեկանիվով մեքենաների ներմուծման արգելքը նաև պայմանավորված է անվտանգության խնդիրներով, նա անհիմն է համարում:
«Անվտանգության խնդիր բացարձակապես այստեղ չկա: Ենթադրում եմ, որ որոշ մարդկանց անձնական շահերից ելնելով է այս արգելքը դրվում: Անվտանգության տեսակետից դա ուղղակի աբսուրդ է՝ կան շատ ավելի լուրջ խնդիրներ, ավելի առաջնահերթ խնդիրներ, որոնց պետք է անդրադառնալ: Եվ հարցն ավելի շուտ այստեղ սոցիալական է: Եթե մարդ կարողանար գնել նոր մեքենա ավտոսրահից, բնականաբար այսպիսի խնդիր գոյություն չէր ունենա, աշխարհի ոչ մի զարգացած երկրում նման բան չկա, որ արգելք լինի»,-ասաց նա:
Ներմուծող ընկերության տնօրենը կարծում է, որ աջ ղեկով մեքենաների ներմուծման արգելքից հետո անվտանգության խնդիրն ավելի է բարդանալու: Նաև՝ նույն գնով ներմուծվելու են ավելի վատ որակի մեքենաներ:
«Ավելի վտանգավոր է աջ ղեկանիվով մեքենան ձախ դարձնելը, նույն գնային տիրույթում Գերմանիայից կամ Ամերիկայից կբերեն, օրինակ, վթարված մեքենաներ, ավելի մեծ վազքով, որոնք, բնականաբար, ավելի վտանգավոր են: Վտանգը հենց այդտեղ է, ոչ թե աջ ղեկով մեքենաների մեջ»,-ասաց նա:
Նա նշեց, որ պայմանավորված նաև գնային տարբերությամբ և մատչելիությամբ՝ աջ ղեկանիվով մեքենաների պահանջարկը մեծ է:
«Մարդիկ հասկանում են, որ աջ ղեկով մեքենաները շատ ավելի որակով են, և շատ ավելի զգուշավոր են աջ ղեկով մեքենաների վարորդները»,-ասաց նա:
Tert.am-ը փորձեց պարզել նաև այլ ներմուծող ընկերությունների դիրքորոշումը, սակայն շատերը հրաժարվեցին որևէ մեկնաբանություն տալ, իսկ «Ավտոիմպորտ Արմենիա» ավտոմեքենաների ներմուծման ընկերությունից էլ Tert.am-ին միայն ասացին, որ դեմ են նմանատիպ որոշմանը: