Թանկացումների դեմ պայքարը նման է ձմռանը ձյուն գալու դեմ պայքարին՝ իրականանալ չի կարող. սոցիոլոգ (տեսանյութ)
Դժվարությամբ եմ պատկերացնում, թե թանկացումների դեմ հնարավոր փողոցային պայքարից ինչ կարելի է ակնկալել: Tert.am-ի հետ զրույցում ասաց սոցիոլոգ Կարեն Սարգսյանը:
«Երբ մարդիկ փողոց են դուրս գալիս, դրա իմաստը մի փոքր այլ պետք է լինի: Հնարավոր չէ կառավարությունից պահանջել իջեցնել ապրանքների գները, որովհետև մեզ մոտ տնտեսական ազատ հարաբերություններ են: Կառավարությունը չի կարող իջեցնել գները, կարող է վերաբաշխել օրինակ եկամուտները, օրենսդրական մեխանիզմներով ապահովել գերշահույթների նվազում, բայց կառավարությունից գների նվազեցում պահանջել...»,- ասաց Սարգսյանը:
Նա նշեց, որ հանրության դժգոհությունները, հատկապես փողոցային պայքարի տեսքով ձմռանը դժվար են արտահայտվում:
«Ընդդիմությունն էլ իր հերթին պետք է գործառույթ կատարի: Կան մեխանիզմներ, որոնք իրենք պետք է կիրառեն: Հնարավոր գործիքների կիրառումից հետո միայն հնարավոր է մարդկանց փողոց հանել: Մենք բոլորս պետք է տեսնենք, որ հնարավոր գործիքները աշխատեցվել են և եթե դրանք չեն գործել, նոր միայն դուրս գալ փողոց: Սահմանադրական հնարավոր բոլոր մեխանիզմները աշխատեցնելուց հետո միայն կարելի է ակնկալել, որ ժողովուրդը դուրս կգա փողոց, որ մարդիկ ասեն՝ այ տեսեք, հնարավոր ամեն ինչ արեցին, ոչինչ չստացվեց, եկեք դուրս գանք»,- նշեց սոցիոլոգը:
Կարեն Սարգսյանի խոսքով՝ հանրությունը լավ տարբերակում է՝ իրեն տնից կտրում են ու փողոց են հրավիրում քաղաքական դիվիդենտներ ստանալու, թե՞ խնդիրը լուծելու համար:
«Դուրս եկան փողոց, ո՞րն է հաղթանակի շեմը: Դուրս եկան, հետո՞: Մեր ընդդիմությունը նույն հիվանդությունն ունի ինչ դիմությունը. զանգվածային գործողությունները մի պահի վերածվում են կաբինետային բանակցությունների: Երբ գործընթացը կորցնում է հասանելիությունը հանրության համար, դա դառնում է անհետաքրքիր: Կառավարությունը չի կարող գները իջեցնել, ի՞նչ է լինելու երթի վերջը, նրանք չեն կարող լուծում տալ այս հարցին»,- հարց հնչեցրեց նա: Միաժամանակ, նա ասաց, որ լավ կլինի, որ փողոց դուրս գան շատ մարդիկ:
Դիտարկմանը, թե ընդդիմությունը նշում է, որ հաղթանակ կհամարի Հարկային օրենսգրքում փոփոխությունները, որոնցով էլ պայմանավորված են թանկացումները, Սարգսյանը չհամաձայնեց՝ նշելով, որ Հարկային օրենսգիրքը գնաճի հետ կապ չունի:
«Գների փոփոխությունը տնտեսական ազատ հարաբերություններ են, իսկ հարկային դաշտը տնտեսվարողների ու պետության հարաբերությունների դաշտն է: Տեսնում են գերշահույթ, գնում են դրա հետևից, իսկ գերշահույթը պատժելը օրենսդրական խնդիր է: Մարդիկ կան, ովքեր վեր են հարկային, քաղաքական, օրենսդրական դրույթներից»,- նշեց Կարեն Սարգսյանը:
Սոցիոլոգն ասաց, որ կառավարությունից պահանջել նվազեցնել ապրանքների գները ի սկզբանե կատարվել չի կարող, որովհետև կառավարությունը չունի այդ լիազորությունը:
«Ընդդիմությունն ասում է՝ եկեք դուրս գանք, պահանջենք մի բան, որը հնարավոր չէ իրականացնել, իսկ սրանով փողոց դուրս գալու իմաստը արժեզրկվում է: Սա նման է նրան, որ դուրս գանք ու պահանջենք, որ ձյուն չգա ձմռանը»:
Մանրամասները՝ տեսանյութում: