Իրանից եկող գազատարն անցնում է Մեղրիով, բայց այնտեղ գազ չկա, քանի որ «Գազպրոմը» դեռ չի հասել Մեղրի. Մ. Առաքելյանը` իրանական գազի առաջարկի մասին
Իրանական գազի օգտագործման նկատմամբ իշխանության վերաբերմունքը հրաշալի արտահայտում է հետևյալ փաստը` Իրանից եկող գազատարը անցնում է Մեղրի քաղաքով, իսկ Մեղրի քաղաքում բացակայում է գազամատակարարումը, քանի որ «Գազպրոմի» գազը դեռ չի հասել Մեղրի։ Այս մասին Tert.am-ի հետ զրույցում ասաց տնտեսագետ, «Առաքելություն» կուսակցության անդամ Մեսրոպ Առաքելյանը՝ անդրադառնալով իրանական կողմի գազի առևտրի խորացման հերթական առաջարկին: Ըստ նրա՝ Իրանից լրացուցիչ ծավալի գազի ստացման համար որևէ տեխնիկական խնդիր չկա. «Ակնհայտ է, որ հիմնական խնդիրը հայ-ռուսական գազային համագործակցությունն է»,- նշեց տնտեսագետը։
-Իրանի ազգային գազային ընկերության գործադիր տնօրեն Համիդռեզա Արաղին հայտարարել է, որ Թեհրանը պատրաստ է խորացնել Հայաստանի հետ գազի առևտուրը։ Նա նշել է, որ հայկական մասնավոր և պետական հատվածները կարող են Իրանից ավելի շատ գազ գնելու առաջարկով հանդես գալ: Որքանո՞վ է հավանական, որ Հայաստանը կարձագանքի այս առաջարկին, ի՞նչ խոչընդոտող հանգամանքներ կան այստեղ:
-Իրանական գազի թեման արդեն տասնամյակներ քննարկման փուլում է և ակնհայտ է, որ հիմնական խնդիրը հայ-ռուսական գազային համագործակցությունն է։ Իրանից գազ ստանալը ընդամենը համաձայնության հարց է, քանի որ առկա է գազամուղը, որով այսօր է ներմուծվում է իրանական գազ, սակայն բացառապես էլեկտրաէներգիա արտադրելու նպատակով, որը վաճառվում է Իրանին։ Այսինքն լրացուցիչ ծավալի գազի ստացման համար, որը կուղղվի ներքին սպառմանը, որևէ տեխնիկական խնդիր չկա։ Հայաստանի կողմից Իրանի հետ տնտեսական հարաբերությունները ուղղակի գտնվում են խայտառակ վատ մակարդակի վրա, որի զարգացումը ոչ միայն ցանկալի, այլ նաև անհրաժեշտ ռազմավարական քայլ է, մասնավորապես էներգակիրներից կախվածության դիվերսիֆիկացման համար։
-Ռուսական և իրանականը գազի գնային և որակական տարբերությունը որքա՞ն է կազմում, եթե տեղյակ եք:
-Այս պահին ռուսական գազի գինը կազմում է 150 դոլար։ Նույն գինն է կազմում նաև իրանական գազի գինը, որը այսօր փոքր ծավալով ներմուծում ենք էլեկտրաէներգիայի արտադրության համար։ Համոզված եմ, որ մեծ ծավալների դեպքում կարելի է ստանալ նաև ավելի ցածր գին։
-Շատ է խոսվում, որ ռուսական գազը Հայաստան սահմանին 1000 խմ վաճառվում է 150 դոլարով, բայց նույն գազը բնակիչներին է հասնում ավելի թանկ: Ճի՞շտ է արդյոք այս տեղեկությունը, և եթե այո, ինչո՞ւ այս պարագայում ՀՀ-ին չի ցանկանում այլընտրանք ստեղծել և մեծացնել Իրանից մատակարարվող գազի ծավալները:
-Ռուսական գազի առաջին «թանկացումը» արդեն տեղի է ունենում Վրաստանում, երբ 10% վճարում ենք ուղղակի տեղափոխման համար։ Մնացած ծախսերը արդեն ներսում կատարվող ծախսերն են՝ սպասարկում, այլ ծախսեր, շահույթ։ Այսինքն, եթե նույնիսկ իրանական գազը նույն հավելյալ ծախսերով վաճառվի, միայն Վրաստանի տարանցիկ ծախսի խնայման արդյունքում, կարող ենք ունենալ ավելի էժան գին։ Իրանական գազի օգտագործման նկատմամբ իշխանության վերաբերմունքը հրաշալի արտահայտում է հետևյալ փաստը՝ Իրանից եկող գազատարը անցնում է Մեղրի քաղաքով, իսկ Մեղրիում բացակայում է գազամատակարարումը, քանի որ «Գազպրոմի» գազը դեռ չի հասել այնտեղ։