Տեսանելի ապագայում Ադրբեջանը կանգնելու է կոտրված տաշտակի առջև. Միհրան Հակոբյան (տեսանյութ)
Ադրբեջանը փորձում է ժամանակ ձգել, հիմա էլ հայտարարելով, թե Հայաստանում ու Ադրբեջանում նախատեսված ընտրություններից հետո ինտենսիվ բանակցություններ կսկսվեն: Tert.am-ի հետ զրույցում ասաց ՀՀԿ խմբակցության պատգամավոր Միհրան Հակոբյանը:
Հիշեցնենք, որ ԵԱՀԿ Մինսկի խմբի համանախագահները երեկ հանդիպել են Ադրբեջանի ղեկավարության հետ, ինչից հետո Ադրբեջանի ԱԳ նախարարի մամուլի խոսնակը տեղեկացրել է, որ ձեռք է բերվել ինտենսիվ բանակցություններ սկսելու պայմանավորվածություն՝ Հայաստանում և Ադրբեջանում նախատեսված ընտրություններից հետո:
«Ադրբեջանի համար սա հերթական առիթն է՝ ձգձգելու բանակցային գործընթացը: Նախընտրական շրջանում, իշխանության տրանսֆորմացիայի շրջանում, գիտենք, որ բանակցային գործընթացը բարդանում է: Հայաստանում էլ ապրիլին սպասվում է իշխանության տրանսֆորմացիա: Ադրբեջանն այնպես արեց, որ իրենց ընտրություններն էլ տեղի ունենան ապրիլին: Եվ հիմա հերթական պատրվակն են գտել՝ ձգձգելու բանակցությունները՝ միաժամանակ դուրս չգալով դրանցից»,- ասաց Միհրան Հակոբյանը:
Պատգամավորը նկատեց, որ «ինտենսիվ բանակցություններ» ասելով՝ Հայաստանն ու Ադրբեջանը միանգամայն տարբեր բաներ են հասկանում:
«Հայաստանի մոտեցումները բանակցային գործընթացի նկատմամբ համընկնում են Մինսկի խմբի համանախագահների մոտեցմանը: Հայկական կողմի ու ՄԽ համանախագահների խոսքերը շատ մոտ են, իսկ Ադրբեջանի պարագայում իրավիճակն այլ է, իրենք բանակցային գործընթացը պատկերացնում են իրենց երազանքների, ցանկությունների համատեքստում: Նրանք կեղտոտ խաղ են խաղում իրենց հանրության ու միջազգային հանրության հետ»,- նշեց Միհրան Հակոբյանը:
Պատգամավորը չհամաձայնեց այն տեսակետների հետ, թե Ալիևն «ինտենսիվ բանակցություններ» սկսելու համաձայնություն տալով՝ միջազգային հանրությունից ևս մեկ անգամ ընտրվելու մանդատ է խնդրում:
«Միջազգային հանրությունն Ադրբեջանի ղեկավարին իշխելու հերթական մանդատ չի տալիս, Ալիևը ինքն է այդ մանդատը վերցնում: Նա վերացրել է ընդդիմադիր բևեռները, որոնք կարող էին այլընտրանք լինել իրեն, նրա կլանում ևս իրեն այլընտրանք չկա: Ուստի նա չունի չվերընտրվելու խնդիր»,- շեշտեց նա:
Հարցին՝ ինչի՞ արդյունքում Ադրբեջանը կհրաժարվի ժամանակ շահելու քաղաքականությունից, պատգամավորը պատասխանեց. «Նավթադոլարային էյֆորիան, որը Ադրբեջանում տիրում էր 2000-ականներից, մոտ ժամանակներում ավարտվելու է, նրանք աստիճանաբար ընկալելու են, որ չունեն եկամուտներ, որ ձեռք բերեն թանկարժեք սպառազինություն, որով շանտաժի կենթարկեն Հայաստանին: Տեսանելի ապագայում կանգնելու են կոտրված տաշտակի առջև»:
Մանրամասները՝ տեսանյութում: