«Երկիր Ծիրանիի» հետ կապված միջադեպը ցույց տվեց, որ քաղաքապետարանում հավաքվել են մարդիկ, որոնց նպատակը ղեկավարությանը հաճոյանալն է. քննարկում (տեսանյութ)
Չորս տարի այն գարշահոտությունը, որը կար Նուբարաշենի բնակիչների համար, «Երկիր Ծիրանի» ավագանու անդամները փորձել էին տեղափոխել քաղաքապետարան. ի՞նչ կարիք կար այդպես հարձակվել, դա նորմալ տեխնոլոգիա էր. այս մասին այսօր մամուլի ասուլիսին ասաց լեզվաբան Նարինե Դիլբարյանը՝ անդրադառնալով Երևանի ավագանու նիստում տեղի ունեցած միջադեպին։
Նա նշեց, որ ավագանիում մեծամասնության պահվածքը քաղաքական ոչ մի տեխնոլոգիայի մեջ չի տեղավորվում: «Այդ հարձակումը ցույց տվեց, որ մեր քաղաքապետարանում իբր թե ընտրությամբ հավաքվել են մարդիկ, որոնց նպատակը իրենց ղեկավարությանը հաճոյանալն է և քաղաքի շահերին հակառակ գործելը»,-ասաց նա:
Նա որքան էլ զարմանալի համարեց, բայց նշեց, որ «Երկիր Ծիրանին» ավագանու միակ խմբակցությունն է, որը բացահայտում է նրանց ապօրինությունը:
«Ես կարծում եմ, որ քաղաքապետարանի այդ անհեթեթ, անօրինական պահվածքի մեղավորներն ուղղակի պետք է պատժվեն, և առաջին մեղավորներից մեկը Տարոն Մարգարյանն էր, ով գոռում էր՝ «դեմը առեք»: Նրանց ամբողջ արածը սովորական խուլիգանություն է»,-ասաց նա։
Գերագույն խորհրդի պատգամավոր Ազատ Արշակյանը նշեց, որ քսան տարի առաջ այդ խնդիրը եղել է, սակայն դա քաղաքապետարանի խնդիրը չէ, դրա համար հատուկ գերատեսչություններ կան, որոնք քաղաքապետարանին չեն ենթարկվում: Ըստ նրա` քաղաքապետը դրա հետ որևէ առնչություն չունի:
Ազատ Արշակյանը նշեց, որ դեմ չէ ակցիային, սակայն կարծում է, որ կարելի էր անուշահոտ ակցիաներ անել, օրինակ՝ տորթ շպրտեին: «Քաղաքապետը ինչո՞ւ պետք է հրաժարական տա: Նրանք, ովքեր բռնություն են կիրառել, պետք է համապատասխան պատիժ ստանան: Չեմ ասում կնոջը, ընդհանրապես բռնարարը»,-ասաց նա և կոչ արեց գենդերային հարցը հանել։
Հայաստանի դեմոկրատական կուսակցության ղեկավար Արամ Գասպարի Սարգսյանը նշեց, որ «Երկիր Ծիրան»-ին պետք է զգուշացներ, թե ինչ են կազմակերպել:
«Դա բոլորի համար էլ անակնալ էր, և նրանք առանց հայտարարելու գնացին դեպի քաղաքապետարանի սեղան: Ես կարող եմ ֆորմալ տեսանկյունից ասել, որ այնտեղ մահափորձ էր կամ ուրիշ սադրանք էր»,-ասաց նա:
Իսկ ինչ վերաբերում է բռնությանը, ապա Արամ Սարգսյանը նշեց, որ դատապարտելը քիչ է: «Դա ցույց է տալիս, որ մենք դեռ վայրենի մարդիկ ունենք, որոնք կոչվում են տղամարդ և կարող են թույլ տալ այդպիսի բաներ»,-ասաց նա: