Գերմանիայի թուրքերը դատի են տալիս իրենց «ուղտարած» և «թափթփուկ» կոչած ազգայնական պատգամավորին
Գերմանիայի թուրքերը պատրաստվում են դատի տալ «Բունդեսթագի» աջ ազգայնական պատգամավոր Անդրե Պոգգենբուրգին, ով նախօրեին թուրքերին անվանել է անհայրենիք ուղտարածներ ու հիշեցրել մեկուկես միլիոն հայերի ցեղասպանության մասին: Աղմկահարույց այս հայտարարությունը հնչել էր Զատկի տոնին նախորդած ավագ չորեքշաբթի օրը՝ Գերմանիայում ավանդաբար անցկացվող հավաքի ժամանակ, երբ քաղաքական ուժերի ներկայացուցիչները գարեջրի սեղանների շուրջ սուր քննադատության են ենթարկում ընդդիմախոսներին:
«Այդ չաման վաճառողների վրա դեռ 1,5 միլիոն հայերի ցեղասպանությունն է ծանրացած, և նրանք դեռ մեզ ուզում են պատմություն սովորեցնել ու հայրենիքի՞ց խոսել: Այդ խելապակասները մեզ սովորեցնելու ոչինչ չունեն: Այդ ուղտարածներին պետք է իրենց տեղն ուղարկել՝ Բոսֆորից շատ հեռու, իրենց ցեխաշեն խրճիթների ու մեծաքանակ կանանց մոտ»,- ասել էր Պոգգենբուրգը:
Գերմանիայում բնակվող միլիոնավոր թուրքեր գերմանացի ազգայնական գործչի թիրախում էին հայտնվել այն բանից հետո, երբ քննադատել էին Գերմանիայի ներքին գործերի նախարարությունը Հայրենիքի նախարարություն կոչելու առաջարկը: «Այդ «հայրենիք» եզրույթի վրա կենտրոնանալը հանդուրժողականություն տարածելու փոխարեն ավելի կխորացնի բաժանարար գծերը»,- հայտարարել էր Գերմանիայի թուրքական համայնքի առաջնորդը:
«Նրանք իրենց իրավունք են վերապահում մեզ դա՞ս տալ»,- հակադարձել էր Պոգգենբուրգը՝ չխնայելով նաև երկքաղաքացիություն՝ Թուրքիայի և Գերմանիայի անձնագիր ունեցողներին: «Նրանք իրականում հայրենիք չունեցող թափթփուկներ են, որոնց կարիքը Գերմանիան չունի»,- հավելել էր գերմանացի գործիչը:
Ավելին՝ աջ ազգայնականների հավաքին ներկա գերմանացիները բուռն ու տևական ծափահարություններով են ողջունել խորհրդարանի մեծությամբ երրորդ խմբակցության պատգամավորին: Ոմանք անգամ բացականչել են՝ թուրքերին պետք է արտաքսել:
Գերանիայի քաղաքական դաշտում, սակայն, ազգայնականների առաջնորդի ելույթը միանշանակ չի ընդունվել․ Գերմանիայի նախագահ ֆրանկ Վալտեր Շտայնմայերը քննադատել է նրան՝ հորդորելով զերծ մնալ ատելություն սերմանող կոչերից, Գերմանիայի թուրքական համայնքը համակարգող կազմակերպության նախագահ Գոկայ Շոֆօղլուն էլ սպառնացել է դատարան դիմել: «Մենք այսպիսի վիրավորանքները չենք կարող կուլ տալ կամ մոռացության մատնել: Ի վերջո՝ այդ հայտարարությունները հնչում են մի կուսակցության կողմից, որն այժմ տեղ ունի Գերանիայի խորհդարանում»,- հայտարարել էր Գոկայ Շոֆօղլուն:
Պոգգենբուրգի՝ «Գերմանիայի այլընտրանք» աջ ազգայնական կուսակցությունն անցած աշնանը կայացած խորհրդանական ընտրություններում ստացավ ձայների 13 տոկոսը՝ երկրորդ համաշխարհային պատերազմից հետո առաջին անգամ դառնալով «Բունդեսթագի» երրորդ ամենամեծ խմբակցությունը: