Facebook-ը դադարեցնում է 6 երկրում լրահոսի փոփոխության հետ կապված փորձարկումը
Աշխարհի խոշորագույն Facebook սոցկայքը հայտարարել է, որ դադարեցնում է 6 երկրում իրականացվող փորձարկումը, որի շրջանակում պրոֆեսիոնալ լրատվական բնույթի հրապարակումները հեռացվել էին օգտատերերի լրահոսից:
Ինչպես նշում է The Guardian-ը, անցած տարվա հոկտեմբերից սկսած ընկերությունը լրահոսի բովանդակության հետ կապված փոփոխություններ սկսեց իրագործել Շրի Լանկայում, Գվատեմալայում, Բոլիվիայում, Կամբոջայում, Սերբիայում և Սլովակիայում: Տվյալ երկրների օգտատերերի համար ստեղծվել էր առանձին լրահոս՝ «հրապարակային գրառումների» համար։
Հայտնի է, որ փորձարկումն իրականացվել է մի քանի ամիս ու բուռն քննադատությունների ենթարկվել: Նորարարության ընդդիմախոսների պնդմամբ՝ այն նպաստում է սոցիալական հարթակում կեղծ լուրերի ու ապատեղեկատվության տարածմանը:
Մինչդեռ Facebook-ի լրահոսի գծով ղեկավար Ադամ Մոսերին ավելի վաղ հայտարարել էր, որ լուրերի ծավալի զգալի կրճատումն անհրաժեշտ է, քանի որ օգտատերերը ցանկանում են ավելի շատ հրապարակումներ ստանալ իրենց ընկերներից, հարազատներից ու նվազեցնել բիզնեսի, քաղաքականության մասին լուրերը:
Փորձարկվող երկրներում անմիջապես դժգոհության ալիք բարձրացավ՝ ինչպես օգտատերերի, այնպես էլ լրատվական կազմակերպությունների շրջանում:
Պարբերականը հավելում է, որ տվյալ փորձարկումը կապ չունի այս տարվա հունվարին Facebook-ի կողմից գլոբալ ֆեյսբուքյան լրահոսում իրականացված փոփոխության հետ, որը կրճատում է հանրային կոնտենտն ու առաջ բերում սոցիալական շփմանը նպաստող հրապարակումները: