Արկադի Տեր-Թադևոսյանը խորհուրդ է տալիս բանակին օգնել՝ առանց «տժվժիկի պատմությունը սարքելու»
Արցախի հերոս, գեներալ-մայոր Արկադի Տեր-Թադևոսյանը՝ Կոմանդոսը, վստահ է, որ ազգ-բանակ ծրագիրն առաջ է գնում, ժողովրդի մեջ շարժ կա, բայց գաղափարախոսության քարոզչությունը ոչ ճիշտ ուղղությամբ է տարվում:
«Շարժը կա, արդյունքները դրական են, մենք պետք է հասկանանք, որ այն վիճակը, որ ասում ենք միշտ պետք են նորություններ, փոփոխություններ, հիմա այդ ծրագրերի մեջ մտցրել ենք, մեկը քննադատում է, մեկը լավ բան է ասում: Իհարկե, հասկանում եմ, որ դրական շարժի մեջ մի բացասական կողմ կարող է լինել, բայց ընդունված է, որ այդ բացասականի մասին ավելի շատ են խոսում, քան դրականի մասին»,-Tert.am-ի հետ զրույցում ասաց նա:
Արկադի Տեր-Թադևոսյանը միանշանակ բացասաբար է վերաբերվում ֆեյսբուքյան որոշ օգտատերերի` բանակին նվիրված «բարեգործական» նախաձեռնությունների հրապարակայնացմանը՝ տուֆ, լվացքի մեքենա և այլն:
«Չեմ հասականում այդ շարժումները, եթե մարդիկ ուզում են օգնել, հասկանում են, որ պարտքն են կատարում,պետք չէ շոու սարքել, անել զուտ խոսակցության համար: Եթե ուզում ես, օգնի, բայց ձայն էլ մի հանի, այդ շարժումներին ես բացասական եմ վերաբերում, որովհետև դրանք ավելի շատ վնասում են, քան` օգուտ բերում: Նման արտահայտություն կա չէ՞, որ ուզում են լավ բան անել, բայց ավելի վատն է ստացվում, բանակը դրա կարիքը չունի»,-ասաց նա:
Ըստ գեներալ-մայորի՝ բանակին շատ ավելի կօգնի լավ խոսքը, զինվորին ուղարկած նամակը: «Ինչո՞վ կարող ենք օգնել ՝ խոսքով, նամակով, մի բան տանել, իրենց պարտքը կատարել, բայց մարդիկ իրավունք չունեն մի կոնֆետ տալ ու ասել` տեսեք ես կոնֆետ եմ տվել: Կարևորը «տժվժիկի օրը չգցենք» հասկանո՞ւմ եք: Մենք մեր պատմությունը հո լավ գիտենք, մեկը գնում է բանակ, սիգարետ է տալիս կամ չգիտեմ ինչ, հետո նկարում են ցույց են տալիս, ասում են` բանակին օգնում ենք, մեր պարտք է բանակին օգնելը, բայց տժվժիկի օրը չգցենք»,-ասաց նա:
Ի տարբերություն նման քայլերի, Արկադի Տեր–Թադևոսյանը նշեց, որ շատ են այն օգնությունները, որոնք արվում են լուռ, առանց մատնանշելու: «Լուրջ փոփոխություններ եղել են, օգնողներն էլ շատ են, ովքեր աշխատում են առանց ցույց տալու: Առաջնագծում բավական չափով աշխատանքներ կատարվել են: Ես իմ մոտ ունեմ խումբ, պատերազմ անցած են, փոխգնդապետ Նարինե Մարտիրոսյանի հետ ամեն ամիս Դոսաֆից գնում են առաջնագիծ, զինվորների հետ հանդիպում: Նա տեսել է լավն էլ, վատն էլ, լուրջ գործողություններ են գնում առաջնագծում»,-ասաց նա: