Ընդդիմությունը կարող է հանրահավաքներ անել, բայց դա կեղծ քաղաքական օրակարգ է. Էդուարդ Շարմազանով
ՀՀԿ-ն «Ելք»–ի քաղաքական օրակարգով առհասարակ չի հետաքրքրվում. այսօր ՀՀԿ ԳՄ նիստի ավարտից հետո նման տեսակետ հայտնեց ԱԺ փոխնախագահ, ՀՀԿ խոսնակ Էդուարդ Շարմազանովը՝ անդրադառնալով հարցին, թե որտեղ են նախընտրում տեսել «Ելք»-ին՝ խորհրդարանո՞ւմ, թե փողոցային պայքարում: Նա շեշտեց ՝«Ելքն» առանձին քաղաքական միավոր է, և իրենք պետք է որոշեն, թե ինչպես վարվել: Միևնույն ժամանակ նա նկատեց, որ գլոբալ առումով քաղաքական գործընթացները պիտի լինեն պառլամենտում, և խորհրդարանական ընտրություններն էլ ցույց տվեցին, որ միտինգների, հետընտրական զարգացման կարիք չկա:
«Կարող են հանրահավաքներ անել, սակայն դա կեղծ քաղաքական օրակարգ է, քանի որ քաղաքացիներն արդեն իսկ ընտրությունների ժամանակ իրենց իրավունքն իրացրել են: Մեր բոլորիս պարտքն է հարգել ՀՀ քաղաքացու որոշումը: Ապրիլյան կառավարության ձևավորումը փորձել ներկայացնել որպես իշխանափոխության կամ իշխանության ձևավորման օրակարգ, կեղծ օրակարգ է, ոչ թե որովհետև ինձ ձեռնտու չէ, այլ որովհետև մինչև 2022 թվականը իշխանությունն էլ, ընդդիմությունն էլ ձևավորված են»,-շարունակեց Շարմազանովը:
ԱԺ փոխխոսնակը վստահ է, որ ընտրությունները ՀՀ քաղաքացիների մոտ որևէ կասկած չեն հարուցել, ավելին՝ գտնում է, որ քաղաքական դաշտի հիմնական ընդդիմադիր խաղացողները` «Ելք» և «Ծառուկյան» դաշինքները, այսօր խորհրդարանում են։ «Ինչ վերաբերում է արտախորհրդարանական ընդդիմության կողմից կազմակերպված ակցիաներին, Էդուարդ Շարմազանովն ասաց, որ այդ ուժերի իրավունքն է օրենքի սահմաններում ներկայացնել իրենց դժգոհությունները։
Հիշեցնենք, որ «Ելքը» հայտարարել էր, թե թույլ չեն տալու, որ Սերժ Սարգսյանը դառնա վարչապետ, դրան հետևել էր Նիկոլ Փաշինյանի հայտարարությունը, թե պայքարը պիտի լինի փողոցում, սակայն դաշինքում դեռ միասնական որոշման չեն եկել, Գևորգ Գորգիսյանն էլ հայտարարում է, որ ծայրահեղ քայլերի չեն գնալու, այսօր պարզ դարձավ, որ Փաշինյանի կուսակցությունը՝ «Քաղաքացիական պայմանագիրը» թեկուզ միայնակ, բայց ապրիլի 3-ին հանրահավաք է անելու: