Նման ակտիվություն չէինք սպասում. ՌԴ գլխավոր հյուպատոսը՝ Գյումրիում ՌԴ նախագահական ընտրությունների քվեարկության մասին
Այսօր Ռուսաստանի Դաշնությունում անցկացվող նախագահական ընտրությունների կապակցությամբ Հայաստանի Գյումրի քաղաքում բացվել է 4 ընտրատեղամաս:
«Արմենպրես»-ի հաղորդմամբ՝ եթե Գյումրիում տեղակայված ռազմաբազայի տարածքում գործող տեղամասերում հիմնականում քվեարկում էին զինվորականներն ու նրանց ընտանիքների անդամներն, ապա Գյումրիում ՌԴ հյուպատոսարանի տարածքում տեղակայված № 8031 տեղամասում քվերակության են գալիս ինչպես Շիրակի ու Լոռու մարզերից, այնպես էլ հարևան Վրաստանից:
«Մենք ենթադրում էինք, որ մոտ 2 հազար քաղաքացի իր պարտքը կկատարի այստեղ: Ամեն դեպքում, դեռ ընտրությունների ավարտին բավական ժամանակ կա։ Բայց նման ակտիվություն չէինք սպասում»,-տեղեկացրել է Գյումրիում ՌԴ գլխավոր հյուպատոս Ալեքսանդր Կոպնինը:
Աղբյուրը նշում է, որ ընտրություններին մասնակցելու ցանկություն հայտնած քաղաքացիների թիվն այնքան մեծ է եղել, որ նրանցից շատերն ավելի քան 40 րոպե սպասել են դրսում: Քաղաքացիների գերակշիռ մասը՝ մոտ 80 տոկոսը, ՌԴ քաղաքացիություն ունեցող հայերն էին, ովքեր ընտրության էին եկել ընտանիքներով՝ երեխաների հետ, ընտրության համար Գյումրի էին եկել նաև Թբիլիսիից ու Վրաստանի այլ տարածքներից։
«Հյուպատոսարանի տարածքում գործող տեղամաս կարող են քվեարկության գալ ՌԴ բոլոր քաղաքացիները: Նման ակտիվություն երբեք չէր նկատվել»,- նշեց հյուպատոսը՝ փաստելով, որ ժամը 13։00-ի դրությամբ արդեն 600 քաղաքացի իր ընտրական պարտքը կատարել էր։