Ռուսաստանում բնակվող հայերն ազատ են քվեարկում, նրանց վրա ճնշում չի գործադրվում իշխանություններին ընտրելու հարցով. Վիկտոր Կոնոպլյով
Ռուսաստանում այս պահին ընթացող նախագահական ընտրություններում տեղի հայերի մասնակցությունը միանգամայն ազատ է: Նրանք ձայն են տալիս այն թեկնածուների օգտին, ում ցանկանում են:
Tert.am-ի հետ զրույցում այս մասին ասաց հասարակական գործիչ, քաղաքական մեկնաբան Վիկտոր Կոնոպլյովը:
Վերջինս նշեց, որ ինքն անձամբ ճանաչում է մի շարք հայերի, ովքեր ամենևին էլ իրենց ձայնը չեն տալիս գործող նախագահ Վլադիմիր Պուտինին:
«Տեղի ազգային փոքրամասնությունները, այդ թվում՝ հայերը, կաշկանդված չեն իրենց ձայնը իշխանություններին տալու մեջ: Ես գիտեմ հայերի, ովքեր իրենց ձայնը տալիս են, օրինակ, Քսենիա Սոբչակին կամ մեկ այլ թեկնածուի, և դա նորմալ է: Այս տեսանկյունից նրանք սահմանափակված չեն ընտրություն կատարել: Ինչի՞ց պետք է վախենան տեղի հայերը, Խորհրդային Միությունից հետո որևէ մեկին քաղաքացիությունից չեն զրկել: Նրանց վրա ճնշում չեն գործադրում, դա իրենց կամքն է, իրենց ընտրությունն է»,- հավաստիացրեց Վ. Կոնոպլյովը:
Ըստ քաղաքական մեկնաբանի՝ եթե մարդն իր էությամբ վախկոտ է, ապա կվախենա ազատ ընտրելուց անկախ նրանից, թե տվյալ երկրում ազգային փոքրամասնություն է, թե ոչ:
Հիշեցնենք, որ Ռուսաստանի նախագահի ընտրություններում առաջադրված է 8 թեկնածու: Առաջադրվել է նաև գործող նախագահ Վլադիմիր Պուտինը, որը 18 տարի է, ինչ երկրի ղեկավար պաշտոններում է:
Ռուսաստանյան լրատվամիջոցների փոխանցմամբ՝ նրա հիմնական մրցակիցն է Կոմունիստական կուսակցությունից առաջադրված թեկնածու Պավել Գրուդինինը:
Երկրի ղեկավարի պաշտոնին հավակնում են նաև Ռուսաստանի Լիբերալ-դեմոկրատական կուսակցության նախագահ Վլադիմիր Ժիրինովսկին, «Քաղաքացիական նախաձեռնության» թեկնածու Քսենիա Սոբչակը, «Յաբլոկո» կուսակցության ղեկավար Գրիգորի Յավլինսկին, երկրի տնտեսական օմբուդսմեն Բորիս Տիտովը, Ռուսական հասարակական միության ղեկավար Սերգեյ Բաբուրինը եւ ՌԴ Կոմունիստական կուսակցությունից անջատված «Ռուսաստանի կոմունիստների» թեկնածու Մաքսիմ Սուրայկինը:
2012-ին նախագահի ընտրությանը մասնակցել էր ռուսաստանցիների 65.3 տոկոսը, Վլադիմիր Պուտինը ստացել էր 63.6 տոկոսի, այսինքն՝ Ռուսաստանում ընտրելու իրավունք ունեցողների շուրջ 45 տոկոսի ձայները: Այս անգամ, Ղրիմի բռնակցումից հետո, ինչին աջակցում են ռուսաստանցիների շուրջ 86 տոկոսը, Կրեմլն ակնկալում է ավելի բարձր մասնակցություն և ավելի շատ ձայներ հօգուտ Վլադիմիր Պուտինի: