Բաքուն դեռ չի հասկանում, թե ընտրություններից հետո ում հետ է վարելու բանակցությունները՝ վարչապետի, թե նախագահի. Տրոֆիմչուկ
Որևէ «կրեատիվություն» չինովնիկներից սպասել պետք չէ:
Tert.am-ի հետ զրույցում այսպես արտահայտվեց միջազգայնագետ, անվտանգության և պաշտպանության ոլորտների փորձագետ, ռուս վերլուծաբան Գրիգորի Տրոֆիմչուկը՝ խոսելով Ադրբեջանի արտաքին գործերի նախարար Էլմար Մամեդյարովի հայտարարության մասին, թե Հայաստանի արտգործնախարար Էդվարդ Նալբանդյանի հետ վերջին հանդիպան ժամանակ ԵԱՀԿ Մինսկի խումբը «կրեատիվ» առաջարկներ է արել:
Գրիգորի Տրոֆիմչուկն ասաց, որ հնարավոր կրեատիվությունը հիմա կարող է կապվել միայն ղարաբաղյան հակամարտության նկատմամբ ԱՄՆ ունեցած դիրքորոշման փոփոխության հետ:
«Մնացած բոլոր պահեստային տարբերակները բացառվել են: Վերջերս ԵԱՀԿ Մինսկի խմբի ամերիկացի նոր համանախագահ Էնդրյու Շեֆերը ևս ինտրիգային հայտարարություններ արեց՝ կիրառելով առեղծվածային ձևակերպումներ»,- նշեց փորձագետը:
Տրոֆիմչուկի խոսքով՝ Էլմար Մամեդյարովը հույս ունի, որ երեք պետություններում կայանալիք ընտրություններից հետո (խոսքը Ադրբեջանի, Հայաստանի և Ռուսաստանի մասին է) բանակցային գործընթացը կընթանա «ավելի ինտենսիվ»: Այնինչ, ըստ նրա, դժվար է ասել, որ ինտենսիվությունը հավասարազոր կլինի արդյունավետությանը:
«Ապրիլյան պատերազմից հետո քիչ թե շատ տարվում է ինտենսիվ երկխոսություն, երբեմն այն ակտիվ է, երբեմն՝ պասիվ. երկու լիարժեք տարի է, ինչ դրանք ընթանում են, սակայն, փաստացի, չեն հանգեցրել ոչնչի: Որևէ «կրեատիվություն» չինովնիկներից սպասել պետք չէ: Իսկ «կրեատիվությունը» ԱՄՆ կողմից կարող է ենթադրել Ղարաբաղի սուվերենության ուժեղացում: Այս տեսանկյունից պետք է ուշադիր հետևել Բակո Սահակյանի այցին Միացյալ Նահանգներ: Հատկապես, երբ նմանօրինակ այցն առաջին անգամ չէ»,- նշեց Գրիգորի Տրոֆիմչուկը:
Ինչ վերաբերում է պաշտոնական Բաքվից վերջին օրերին հնչեցվող տեսակետներին, թե ղարաբաղյան հակամարտության կարգավորման շուրջ տարվող բանակցություններն ավելի ինտենսիվ կդառնան երկու կողմերում սպասվելիք ընտրություններից հետո, ապա փորձագետն ասաց.
«Եթե ընտրություններից հետո տարվեն ավելի ակտիվ բանակցություններ, ապա կուզեի հասկանալ, թե ինչպես է դա արվելու գործնականում: Ամեն օ՞ր են բանակցելու, թե՞ շաբաթը երկու անգամ: Եթե տեղաշարժի, առաջընթացի հնարավորություն կա, ապա դա կարելի է անել, ըստ էության, առանց բանակցելու:
Եթե Բաքուն, որը կասկածամտորեն էր վերաբերվում հետապրիլյան բանակցություններին, հիմա հանդես է գալիս որպես այս գործընթացի ինտենսիվացման կողմնակից, դա նշանակում է, որ ԱՄՆ-ին ամեն դեպքում հաջողվել է փոքր-ինչ մեծացնել ազդեցությունն այս գործընթացի վրա: Ադրբեջանը դեռևս չի հասկանում, թե հայկական կողմից ում հետ է հանդիպելու, ում հետ է բանակցելու ընտրություններից հետո: Բաքուն դեռ չի հասկանում, թե որ դեմքի հետ են տարվելու բանակցությունները՝ վարչապետի, թե սահմանափակ լիազորություններով ներկայացող նախագահի»:
Տրոֆիմչուկը նշեց, որ Ի. Ալիևի հետ բանակցությունների սեղանին նստող անձի ընտրության հետ կապված Հայաստանում հրաշքներ չեն լինի, որովհետև Հայաստանում ընտրությունները կանցնեն՝ ավելի վաղ նախանշված քաղաքական ծրագրին համաձայն: