«Հրապարակ». Առաջիկայում փոփոխություններ են սպասվում դիվանագիտական կորպուսում
«Մեր տեղեկություններով՝ առաջիկայում փոփոխություններ են սպասվում դիվանագիտական կորպուսում: Հավանաբար, վերջապես կփոխվի Ֆրանսիայում ՀՀ դեսպան 77-ամյա Վիգեն Չիտեչյանը, ով 1995-ից դեսպան է աշխատում, որից 11 տարին՝ Ֆրանսիայում: Նրան վերջին տարիներին չէին փոխում, քանի որ լուրեր կային, որ ԱԳ նախարար Էդվարդ Նալբանդյանը մտադիր է վերադառնալ հին պաշտոնին՝ Ֆրանսիայում դեսպան: Ասում են, թե նա անգամ դեսպանատանը փակ սենյակ ունի, որտեղ իր իրերն են, և ոչ ոք մուտք չունի: Սակայն Նալբանդյանը նաև կարողանում է ճարպկորեն պահել ԱԳ նախարարի աթոռը, և չնայած ողջ նախարարությունը երազում է, թե երբ է նա հեռանալու, բայց կարծես մոտ ապագայում նրան չեն ազատի, ուստի տարեց դեսպանին փոխարինող են գտել: Ըստ լուրերի՝ Ֆրանսիայում դեսպան կնշանակվի Շվեյցարիայում ՀՀ դեսպանության արտակարգ դեսպանորդ և լիազոր նախարար Հասմիկ Տոլմաջյանը:
Հիշեցնենք, որ Շվեյցարիայում դեսպանը Շառլ Ազնավուրն ե Մենք տեղեկացանք, որ շուտով պաշտոնին հրաժեշտ է տալու նաև Ավստրիայում ՀՀ դեսպան, ԱԳ նախկին փոխնախարար Արման Կիրակոսյանը, որն այդ պաշտոնին է 2011-ից: Նա առողջական խնդիրներ ունի և «թեթև» գործի կանցնի՝ Ցեղասպանության թանգարան-ինստիտուտի տնօրեն: Այս պաշտոնը թափուր է Հայկ Դեմոյանի՝ ԱՄՆ մեկնելուց հետո: Ինչ վերաբերում է Ավստրիայում ՀՀ դեսպանի պաշտոնին, ապա այն լուրջ կռվախնձոր է դարձել ԱԳՆ-ում: Մի նշանակում ևս. մոտ ժամանակներս Իսրայելում ՀՀ դեսպան կնշանակվի, նստավայրը՝ Երևան, Ռուսաստանում ՀՀ նախկին դեսպան, մշակույթի նախկին նախարար Արմեն Սմբատյանը: Այդ գործը համատեղության կարգով անում էր Եգիպտոսում դեսպան Արմեն Մելքոնյանը»,-գրում է թերթը:
Նյութն ամբողջությամբ կարդացեք թերթի այսօրվա համարում: