Երկու գործարար համոզել է Թրամփին ազատել Թիլերսոնին պետքարտուղարի պաշտոնից՝ սաուդացիների և ԱՄԷ-ի շահերից ելնելով. The New York Times
Ամերիկացի գործարար Ջորջ Նադերը և ԱՄՆ-ում իշխող Հանրապետական կուսակցության խոշոր դոնոր Էլիոտ Բրոյդին, օգտվելով նախագահ Դոնալդ Թրամփի հետ ծանոթությունից, նրան ներշնչել են Ռեքս Թիլերսոնին պետքարտուղարի պաշտոնից հեռացնելու և Սաուդյան Արաբիայի ու Արաբական Միացյալ Էմիրությունների շահերից բխող արտաքին քաղաքականություն իրականացնելու միտքը: Այդ մասին գրում է The New York Times-ը:
Թերթը, վկայակոչելով Նադերի և Բրոյդիի փաստաթղթերը, նշում է, որ նրանց միավորված ջանքերը նպաստել են ԱՄՆ-ի և ԱՄԷ-ի միջև ավելի քան 200 միլիոն դոլարի պայմանագրեր կնքելուն:
Նշվում է, որ Նադերը և Բրոյդին Թրամփին դրդել են ավելի կոշտ դիրքորոշում ընդունել Իրանի և Քաթարի նկատմամբ: 2017 թվականի ամռանը Սաուդյան Արաբիան, ԱՄԷ-ն, Բահրեյնը և Եգիպտոսը հայտարարել են Քաթարի հետ դիվանագիտական հարաբերությունները խզելու մասին՝ մեղադրելով Դոհային ահաբեկչությանն աջակցության և նրանց ներքին գործերին միջամտելու համար: Թիլերսոնը, ղեկավարելով ամերիկյան դիվանագիտությունը, ավելի զուսպ քաղաքական գիծ էր վարում Քաթարի նկատմամբ, ինչը դուր չէր գալիս Էր Ռիադին:
Ավելի վաղ ԱՄՆ նախագահ Դոնալդ Թրամփը հայտարարել է, որ Ռեքս Թիլերսոնը հեռացվել է պետքարտուղարի պաշտոնից, իսկ նրա փոխարեն առաջադրվել է Կենտրոնական հետախուզական վարչության նախագահ Մայք Պոմպեոյի թեկնածությունը: Ավելի ուշ Թիլերսոնը հստակեցրել է, որ պաշտոնապես իր լիազորությունները դադարեցվում են մարտի 31-ից: Նա հայտարարել է, որ կհանձնարարի ժամանակավորապես կատարել իր պարտականություններն ԱՄՆ պետքարտուղարի առաջին տեղակալ Ջոն Սալիվանին: