Volkswagen-ը հազարավոր լքված դիզելային ավտոմեքենաներ է պահում անապատներում (լուսանկարներ)
Այս տարվա փետրվարին Volkswagen ընկերությունն ամերիկացիներից ավելի քան 350 000 դիզելային ավտոմեքենա է գնել՝ դրա համար շուրջ 7.4 մլրդ դոլար ծախսելով:
Ինչպես հայտնում է Reuters գործակալությունը՝ բոլոր մեքենաները, որոնք ավտոարտադրողը ձեռք է բերում տերերից, պահվում են ԱՄՆ-ի ողջ տարածքում գտնվող 37 կայանատեղիում: Գործակալությունը ցուցադրել է այդ հսկայածավալ կայանտեղիներից մեկը, որտեղ տասնյակ հազարավոր մեքենաներ են պահվում:
Գերմանական ավտոարտադրողը դիզելային սկանդալի պատճառով գնված ավտոմեքենաները պահում է տարբեր հրապարակներում, ինչպես օրինակ՝ Դետրոյթի լքված ֆուտբոլի դաշտում, Մինեսոտայի թղթի նախկին գործարանում և նույնիսկ Կալիֆոռնիայի անապատում:
Բոլոր հրապարակներում մեքենաները պահվում են ժամանակավորապես և պարբերաբար տեխնիկական սպասարկում են անցնում՝ մնալով աշխատունակ վիճակում: Ընկերությունը մտադիր է այդ մեքենաները վաճառել երկրորդային շուկայում կամ արտահանման ուղարկել: