Ճշմարտության էլեմենտ չկա. Գագիկ Եգանյանի պարզաբանումը, թե Հայաստանի միջնորդությամբ են Գերմանիայից հայերն արտաքսվում հայրենիք
Տարածքային կառավարման նախարարության միգրացիոն պետական գործակալության պետ Գագիկ Եգանյանը Tert.am-ի հետ զրույցում պնդեց, թե այն հայտարարությունները, թե Հայաստանի միջնորդությամբ են Գերմանիայից հայերը արտաքսվում հայրենիք, որևէ հիմք չունեն:
«Ճշմարտության էլեմենտ չկա իրենց ասածի մեջ, ցանկացած քաղաքացի անօտարելի իրավունք ունի իր երկիրը վերադառնալու, բացարձակ իրավունք է, և եթե անձը գտնվում է օտարերկրյա պետությունում և դեռ բնակության իրավունք չունի, տվյալ երկիրն է որոշում ազատվել այդ քաղաքացուց, թե ոչ»,-ասաց նա:
Հիշեցնենք, որ Գերմանիայից մոտ 50 հայերի էին արտաքսել, որոնք Հայաստան են ժամանել հատուկ ուղիղ չվերթով: Քաղաքացիները Tert.am-ի հետ զրույցում նշել էին, թե արտաքսելով նրանց ասել են, որ Հայաստանն ասում է «եկե՛ք այստեղ, մենք կարող ենք ձեզ բուժել»:
Ըստ Եգանյանի՝ տվյալ դեպում Գերմանիայի որոշելիքն է, իր պետության սահմաններում անօրինական ձևով գտնվող օտարերկրյա քաղաքացիներից ազատվել, թե ոչ: «Որովհետև ոչ մի երկրի, այդ թվում Գերմանիան, կամ թեկուզ Հայաստանը, չեն ցանկանում իրենց տարածքում ունենալ անօրինական կարգավիճակում գտնվող օտարերկրացիներ: Նույն ձևով, եթե որևիցե երկրի քաղաքացի Հայաստանում է գտնվում և բնակության իրավունք չունի, ՀՀ-ն փորձում է պարզել, որ երկրի քաղաքացին է և այդ օտարերկրյա քաղաքացուն ասում է՝ գնա քո երկիրը, իսկ տվյալ երկիրը որևէ առնչություն չունի դրա հետ: Այս դեպքում էլ Հայաստանն անձամբ հետ գալու հետ կապված որևէ առնչություն չունի»,- ասաց նա:
Միգրացիոն պետական գործակալության պետը նշեց, թե լավագույն դեպքում միայն կարող են հարցում ուղարկել Հայաստանին՝ պարզելու համար, թե տվյալ անձը ՀՀ քաղաքացի է, թե ոչ, և երբ հաստատվի, որ ՀՀ քաղաքացի է՝ արտաքսեն:
«Խնդիրն այն է, որ անձինք օտարերկրյա պետությունում գտնվելիս օրինական բնակության հիմք պետք է ունենան, բուժումը կապ չունի, ուսումը, աշխատանքը կապ չունի, ինչ-որ անում են այնտեղ, պետք է օրինական բնակության իրավունքով անեն, եթե չունեն, դա ոչ թե երկիրն է պահանջում, քավ լիցի, բացարձակապես նման բան չկա, հարյուր հազարներով քաղաքացիներ ունենք, որոնց գերակշիռ մասը, կամ մի մասը կարգավիճակ չունի, տեղեկություն էլ չունենք, թե ով ունի կարգավիճակ, ով չունի»,-ասաց նա:
Հարցին, թե ինչու են արտաքսված քաղաքացիներին նման պատճառաբանություն բերել, թե Հայաստանն է պահանջել, Եգանյանն ասաց, որ նման բան չկա:
«Այդպիսի բան չկա, չգիտեմ ոնց են ասել, ով ինչ է հասկացել, նմանատիպ հարցեր չեն կարող լինել: Անձը ցանկացած երկրում ինչ նպատակով, որ գնում է, բուժվում է, թե սովորում է, պետք է օրինական հիմքերի վրա լինի, եթե օրինական հիմքեր չկան, տվյալ երկիրը օր առաջ փորձում է ազատվել այդ օտարերկրյա քաղաքացուց: Այդ երկիրը ցանկանա էլ չի կարող փակել այդ մարդկանց առաջ հետդարձի ճանապարհը»,– ասաց նա:
Իսկ թե հնարավո՞ր է ներքին կարգով պետությունները համաձայնության գան, Գագիկ Եգանյանը պատասխանեց, թե կդժվարանա նման խոսակցությունները մեկնաբանել։