Ոռոգելի տարածքների 50%-ն է օգտագործվում, իսկ ոռոգման ջրի սակագինը, եթե վերանայվի, պետք է բարձրանա. Արսեն Հարությունյան
Ջրային տնտեսության պետական կոմիտեի նախագահ Արսեն Հարությունյանը այսօր լրագրողների համար կազմակերպված սեմինարին անդրադառնալով ներդրումային ծրագրերին, ասաց, որ 2018 թվականի կեսին կավարտեն ոռոգման համակարգերի բարելավման ծրագիրը, որի համար նախատեսված է 30 միլիոն դոլար չափով ներդրում և ևս 7,5 միլիոն դրամ համաֆինանսավորում:
Հաջորդ ծրագիրը Վեդու ջրամբարն է, և այս պահի դրությամբ աշխատանքների մոտավորապես 30 տոկոսը իրականացրել են:
«Ստարտ ենք տալիս ոռոգման համակարգերի արդիականացման ծրագրին, որը կիրականացվի Հայաստանի ողջ տարածքի 99 համայնքներում և շահառուների ընդհանուր քանակը կկազմի 150 հազար մարդ»,-ասաց նա:
Խոսելով ոռոգելի հողատարածքների մասին, Արսեն Հարությունյանը հայտնեց, որ ընդհանուր ոռոգելի տարածքները 200 հազար հեկտար են, որի 50%-ն ենք ոռոգում: Նա նշեց, որ Արարատյան դաշտավայրում 24 hազար հեկտար ոռոգելի տարածք կա, որն ունի նաև ոռոգման ջրի հնարավորություն, սակայն չի օգտագործվում:
«Ջուրը հենց այգուն մոտ է, հողատարածքներն ամբողջությամբ ոռոգման տակ են, բայց չեն օգտագործվում»,-ասաց նա և նշեց, որ դիմել են պաշտպանության նախարարությանը, որ տրամադրեն իրենց անօդաչու սարքերը, որպեսզի դրանցով հողատարածքների գույքագրում անեն և պարզեն՝ կա՞ն թաքնված հողատարածքներ, որոնք ոռոգվում են, բայց ոռոգման գումար չեն վճարում, թե ոչ։
«Մարզպետարանների հետ միասին ենք մենք ծրագիրն իրականացնում, ուղղակի մենք դրոնների միջոցով փորձելու ենք իրական հողատարածքների չափագրումն իրականացնենք, և հնարավոր է՝ լինեն այգիներ, որոնք ո՛չ մարզպետարանում, ո՛չ գյուղապետարանում տեղյակ չեն, որ այդ այգիներն սկսել են ոռոգել»,-ասաց նա:
Արսեն Հարությունյանը հայտնեց, որ գյուղնախարարության հետ միասին Հանրապետությունում 26 հազար հեկտար հողատարածք ենք գույքագրել, որոնք հնարավոր է ոռոգել, և դրա ընդհանուր բյուջեն կազմում է մոտ 30 մլրդ դրամ։
«Միջին հաշվով՝ մեկ հեկտար հողատարածքի ոռոգումն ապահովելու համար անհրաժեշտ է շուրջ 1.1 մլրդ դրամ։ Ամենաէժանը Շիրակի մարզի հողերն են, որոնց դեպքում մեկ հեկտարի ոռոգումն ապահովելու համար անհրաժեշտ է մոտ 500 հազար դրամ»,-ասաց նա:
Անդրադառնալով ոռոգման ջրի սակագնին, ապա Արսեն Հարությունյանն ասաց, որ եթե սակագինը պետք է վերանայվի, ապա այն պետք է բարձրանա, քանի որ 12-13 տարի է, ինչ այդ գինը անփոփոխ է: «Հարցի լուծման լավագույն տարբերակը կաթիլային համակարգին անցնելն է, որը նաև ավելացնում է բերքատվությունը»,-ասաց նա: