Քրգործ ՀԿԵ Գյումրու դեպոյում խարդախությամբ խոշոր գումարներ հափշտակելու փաստով
Գլխավոր դատախազությունում քրեական գործ է հարուցվել «Հարավկովկասյան երկաթուղի» (ՀԿԵ) ընկերության Գյումրու լոկոմոտիվային դեպոյում պաշտոնեական դիրքն օգտագործելով, մի խումբ անձանց կողմից նախնական համաձայնությամբ խոշոր և առանձնապես խոշոր չափերի գումարներ խարդախությամբ հափշտակելու և փաստաթղթեր կեղծելու առերևույթ հանցագործությունների դեպքերի առթիվ:
Դատախազության հաղորդագրության համաձայն՝ Ոստիկանության կազմակերպված հանցավորության դեմ պայքարի գլխավոր վարչությունում մարտի 29-ին ստացվել է «Հարավկովկասյան երկաթուղի» ընկերության գլխավոր տնօրեն Սերգեյ Վալկոյի հաղորդումն այն մասին, որ նույն ընկերությունում անցկացված՝ աշխատողների աշխատանքի վարձատրման սկզբնական փաստաթղթերի ստուգմամբ պարզվել է, որ Գյումրու լոկոմոտիվային դեպոյի շարժակազմի տնօրինության աշխատանքի կազմակերպման և նորմավորման, ինչպես նաև կադրերի գծով երկու աշխատակիցներ կատարել են հափշտակություններ:
«Ոստիկանության ԿՀԴՊ գլխավոր վարչությունում նախապատրաստված նյութերով տվյալներ են ստացվել այն մասին, որ 2014 թվականի ապրիլին Գյումրու լոկոմոտիվային դեպոյի աշխատակիցներից մեկը աշխատանքից ազատման դիմում է ներկայացրել, սակայն կադրերի գծով մասնագետ Ա. Շ.-ն, խարդախությամբ գումար հափշտակելու շուրջ նախնական համաձայնության գալով աշխատանքի կազմակերպման և նորմավորման գծով առաջատար ինժեներ Ա. Ա.-ի հետ, նշված դիմումը չի ձևակերպել, այդ աշխատակցին չի հանել հաստիքացուցակից: Համապատասխան փաստաթղթերում կեղծ տվյալներ մտցնելով վերջինիս աշխատանքի հաճախելիության վերաբերյալ՝ Ա. Ա.-ն դրանք ներկայացրել է հաշվապահություն, ինչի հիման վրա այդ աշխատակցի անվամբ 2014թ. ապրիլից մինչև 2018թ. հունվարը դուրս է գրվել 5 520 373 ՀՀ դրամ: Ա, Շ.-ն և Ա. Ա.-ն, օգտագործելով իրենց պաշտոնեական դիրքը, խարդախությամբ հափշտակել են նշված առանձնապես խոշոր չափի գումարը», - ասված է հաղորդագրությունում: - «Նույն եղանակով, հաշվապահական փաստաթղթերում կեղծիքներ կատարելու միջոցով, վերջիններս, օգտագործելով պաշտոնեական դիրքը, խարդախությամբ հափշտակել են 2016թ. հունիսին աշխատանքից ազատված Գյումրու լոկոմոտիվային դեպոյի մեկ այլ աշխատակցի անվամբ 2016թ. հունիսից մինչև 2018թ. հունվարը դուրս գրված առանձնապես խոշոր չափի՝ 4 326 906 ՀՀ դրամը»:
Պարզվել է նաև, որ Ա. Ա.-ն, «նախնական համաձայնության գալով Գյումրու լոկոմոտիվային դեպոյի թվով 10 աշխատակիցների հետ խարդախությամբ գումարներ հափշտակելու շուրջ, օգտագործելով պաշտոնեական դիրքը, աշխատավարձերի վճարման հիմք հանդիսացող հաշվապահական փաստաթղթերում կատարել է կեղծ գրառումներ. նշված աշխատակիցների անվամբ 2014-2018 թվականների ընթացքում ձևակերպել է աշխատաժամերի հավելագրումներ, կեղծված փաստաթղթերը ներկայացրել է հաշվապահություն, որոնց հիման վրա ստացված խոշոր չափի 800 000 ՀՀ դրամը խարդախությամբ հափշտակվել է Ա. Ա.-ի և նշված աշխատակիցների կողմից, շարունակում է դատախազությունը:
Նշված դեպքերի առթիվ Հայաստանի գլխավոր դատախազության ՀԿԳ քննության վարչությունում հարուցվել է քրեական գործ՝ Քրեական օրենսգրքի 178-րդ հոդվածի 2-րդ մասի 1-ին, 1.1-րդ և 2-րդ կետերով («խարդախությունը, որը կատարվել է մի խումբ անձանց կողմից նախնական համաձայնությամբ, պաշտոնեական դիրքն օգտագործելով, խոշոր չափերով», 178-րդ հոդվածի 3-րդ մասի 1-ին կետով «խարդախությունը, որը կատարվել է առանձնապես խոշոր չափերով», 325-րդ հոդվածի («Փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը») 1-ին մասով: Նախաքննության համար քրեական գործն ուղարկվել է Քննչական կոմիտե: