Ջինա Հասփելը նշանակվել է ԿՀՎ-ի ղեկավարի պաշտոնում
Ջինա Հասփելը ստանձնել է ԱՄՆ Կենտրոնական հետախուզական վարչության (ԿՀՎ) ղեկավարի պաշտոնը, հայտնում է korrespondent.net-ը՝ ԿՀՎ-ի մամուլի ծառայությանը հղումով:
Նշվում է, որ այս պաշտոնում Հասփելը կփոխարինի Մայք Պոմպեոյին, որի թեկնածությունը նախօրեին ԱՄՆ Սենատի կողմից հաստատվել է երկրի պետքարտուղարի պաշտոնում:
«Ինձ համար մեծ պատիվ է գլխավորել ԿՀՎ-ն նման ճգնաժամային փուլում: Ես խնդրել եմ վարչության աշխատակիցներին կենտրոնացած մնալ մեզ համար կենսական նշանակություն ունեցող առաքելության վրա և անել հնարավորը ԱՄՆ-ի ուժեղ և պաշտպանված լինելու համար», - ասել է Հասփելը:
Հիշեցնենք, որ նախօրեին ԱՄՆ Սենատը կողմ է քվեարկել ԿՀՎ նախկին տնօրեն Մայք Պոմպեոյին ԱՄՆ պետքարտուղարի պաշտոնում նշանակելուն: Սենատը քվեարկել է ձայների 57 կողմ, 42 դեմ հարաբերակցությամբ: Աղբյուրը նկատում է, որ Պոմպեոն Թրամփի նախագահության օրոք այս պաշտոնում երկրորդ թեկնածուն է: Նախկին պետքարտուղար Ռեքս Թիլերսոնին Թրամփը հեռացրել էր անցյալ ամիս՝ անձնական տարաձայնությունների պատճառով: