Վրաստանի նախագահին խորհրդարանում թույլ չեն տվել բանավիճել պատգամավորների հետ
Վրաստանի նախագահ Գեորգի Մարգվելաշվիլին լքել է խորհրդարանի դահլիճը, երբ իրեն թույլ չեն տվել շփվել պատգամավորների հետ «հարց-պատասխանի» տեսքով: Ինչպես հայտնում է РИА Новости-ն, խորհրդարանի նիստը հեռարձակել են վրացական հեռուստաընկերությունները:
Նշվում է, որ վրաց նախագահը խորհրդարանում ելույթ է ունեցել ամենամյա զեկույցով: Նրա ելույթը կարճատև է եղել և հիմնականում քննադատություն է պարունակել իշխող իշխանությունների հասցեին: Նախագահի խոսքից հետո պատգամավորները հարցերով են հանդես եկել, սակայն Մարգվելաշվիլիին թույլ չեն տվել միանգամից պատասխանել: Նա կարող էր հարցերին պատասխանել միայն պատգամավորների ելույթների ավարտից հետո:
Երկրի ղեկավարը խորհրդարանի խոսնակին խնդրել է հնարավորություն տալ իրեն խոսել «հարց-պատասխանի» ռեժիմով, սակայն մերժում է ստացել:
Դրանից հետո նա հայտարարել է, որ ներկա չի գտնվի նիստին, որտեղ իրեն հնարավորություն չի տրվում քննարկում անցկացնել պատգամավորների հետ: