Շիրակի պետական համալսարանից հեռացված պրոռեկտոր Անահիտ Ֆարմանյանը ներկայացրել է ռեկտորի հրաժարականը պահանջելու հիմնական պատճառները
Շիրակի պետական համալսարանը մարզի մայր բուհն է, որն ունի 84 տարվա պատմություն, լուրջ ավանդույթներ և զարգացման ամբիցիոզ տեսլականներ: Մայր բուհը զարգացման ուղով տանելու և բարձրագույն կրթության այսօրվա մարտահրավերներին դիմակայելու համար համալսարանին պետք է հմուտ կառավարիչ, ով կարող է կառավարել մարդկային և ֆինանսական ռեսուրսները, գիտական և կրթական գործունեությունը:
Այս մասին Facebook-ի իր էջում գրել է Շիրակի պետական համալսարանից հեռացված պրոռեկտոր Անահիտ Ֆարմանյանը՝ անդրադառնալով ՇՊՀ ռեկտոր Սահակ Մինասյանից հրաժարական պահանջելու հիմնական պատճառներին։
Գրառման մեջ նա անդրադարձել է վերջին մեկուկես տարվա ընթացքում մի շարք ոլորտներում ռեկտորի գործունեությանը։
Մարդկային ռեսուրսների կառավարման ոլորտում, ըստ Ֆարմանյանի, ՇՊՀ «ռեկտորը» ոչ միայն չունի նման հմտություններ, այլ չունի անգամ պատկերացում մարդկային ռեսուրսների կառավարման կարևորության մասին. աշխատակիցների առաջընթացի, վերապատրաստումների, կատարողականի գնահատման, խրախուսումների մասին մտածելու փոխարեն նա զբաղված է միայն պատժամիջոցներ կիրառելով:
Պրոռեկտորը տեղեկացրել է, որ պաշտոնավարման մեկուկես տարվա ընթացքում ռեկտորը կատարել է անհասկանալի կառուցվածքային փոփոխություններ է կատարել։ «Մի հարվածով, «իրենց դիմումների համաձայն» նա ազատվեց 6 ֆակուլտետի դեկաններից և 21 ամբիոնի վարիչներից։ Նրանք աշխատակիցներ էին, ովքեր արհեստավարժ իրականացնում էին իրենց գործառույթները, աշխատակիցներ, ովքեր ընդամենը իրենց պաշտոններում վերընտրվել կամ ընտրվել էին մեկ ու կես տարի, անգամ մեկ ամիս առաջ: Պարզվեց, որ դիմումները գրել էին խաբվելով, քանի որ Սահակ Մինասյանը հավաստիացրել էր, որ կառուցվածքային փոփոխությունից հետո իրենց իսկ տեղերն են զբաղեցնելու կամ ծայրահեղ դեպքում կառաջարկվի համարժեք նոր պաշտոն: 27 աշխատակիցների հեռացման հրամանները տալուց հետո ռեկտորը դարձավ անհասանելի բոլորի համար, քանի որ պատասխան չուներ տալու իր իսկ ստերի համար: Մինչև այս պահն արդեն անցել է մեկուկես տարի, սակայն բուհն ունի ընտրված ընդամենը երեք ամբիոնի վարիչներ, իսկ մնացածը ԺՊ-ներ են»,-գրել է Ֆարմանյանը։
Ֆինանսների կառավարման ոլորտում, Ֆարմանյանի տեղեկացմամբ, ռեկտորի ֆինանսական հաշվետվությունից երևում է, որ 1 294 222 000 ՀՀ դրամ ունեցող բուհի բացասական շեղումների հանրագումարը կազմել է 242 273 000 ՀՀ դրամ:
«Այսինքն՝ պարզ է, որ ռեկտորը կապ չունի բուհի ռազմավարական զարգացմանը միտված բյուջեի բաշխման հետ, արել է այն, ինչ այդ պահին մտածել է: Ավելին՝ ԿԳ նախարարության հաշվետվությունից հայտնի դարձավ, որ ռեկտորը գնումներն իրականացրել է խախտելով «Գնումների մասին» օրենքի և Կառավարության որոշման հնարավոր և անհնար գրեթե բոլոր կետերը: Բյուջեի ծախսերը թափանցիկ չեն, և պահպանված չեն տեսանելիությունն ու հաշվետվողականությունը»,-գրել է Ֆարմանյանը՝ հավելելով, որ ռեկտորը չի կարողացել տնօրինել և կայուն պահպանել բյուջեն։
Անդրադառնալով գիտական գործունեության կառավարման ոլորտին՝ պրոռեկտորը տեղեկացրել է, որ մինչև այժմ տպագրված չեն 2016 թվականի հոկտեմբերին կազմակերպված «Ներառական կրթության հիմնախնդիրները» խորագրով հանրապետական գիտաժողովի նյութերը, քանի որ գումար չկա: Մինչև հիմա տպագրված չեն 2016 թվականի ուսանողական հանրապետական գիտաժողովի նյութերի ժողովածուն և համալսարանի 2017 թվականի «Գիտական տեղեկագիր» պարբերականը:
«Համալսարան մուտք գործելու առաջին օրը փակեց Գիտության բաժինը, իսկ մեկ տարի հետո էլ անհրաժեշտ չէր գիտական գծով պրոռեկտորի հաստիքը: Այո՛, պարոն Մինասյան, ձեր վարած քաղաքականությունը հակագիտական է»,-ավելացրել է Ֆարմանյանը։
Բարձրագույն կրթության ուսումնական պրոցեսի կառավարման ոլորտում Ֆարմանյանը թվարկել է ռեկտորի կողմից հրահանգավորված մի քանի քայլեր, որոնք, նրա խոսքով, իրականացվել են «Կրթության», «Բարձրագույն և հետբուհական կրթության մասին» օրենքների, բուհի կանոնադրության և այլ իրավական ակտերի խախտմամբ.
- առաջին կուրսի նոր ուսումնական պլաններով պետք է սովորեն բոլոր կուրսերը՝ անկախ նրանից՝ կկրկնվի առարկան, թե՞ ընդհանարապես չի ուսումնասիրվի,
-ինտեգրված ուսուցում՝ հեռակա և առկա բաժինների համատեղ ուսուցում,
- լսարանային ժամերի 50 տոկոսի իրականացում,
- դասաբաշխումների հաստատում հոկտեմբերի 2-ին։
Անահիտ Ֆարմանյանն ամփոփել է գրառումը Սահակ Մինասյանին ուղղված կոչով. «Դադարեցրե՛ք «աթոռակռիվ» տերմինի տակ թաքցնել Ձեր հանցագործությունները և հեռացե՛ք մեր մայր բուհից»: