ԱՄՆ Սենատի հանձնաժողովը հիմք է դրել Արցախում վերականգնողական ծրագրերի ֆինանսավորմանը
ԱՄՆ Սենատի Հատկացումների հանձնաժողովն ընդունել է սենատոր Քրիս Վան Հոլենի առաջարկած զեկույցը որպես 2019 ֆինանսական տարվա արտաքին օգնության օրինագծի մաս՝ նշելով տարիներ շարունակ ձգվող Արցախյան հակամարտության վերաբերյալ շարունակական մտահոգությունը։ Հանձնաժողովը նաև կոչ է արել ԱՄՆ-ին աջակցել «մարդասիրական և առողջապահական ծրագրերին», այդ թվում՝ «ֆիզիկական և կոգնիտիվ հաշմանդամություն ունեցող երեխաների և մեծահասակների համար տարածաշրջանային վերականգնողական կենտրոններին»: Այդ մասին հայտնում է ancnews.info-ն:
Հայ դատի ամերիկյան հանձնախումբը ողջունել է այդ քայլը:
Այդ զեկույցը նախապատվություն է տալիս ԱՄՆ-ի կողմից այնպիսի ծրագրերի ֆինանսավորմանը, ինչպիսին է Ստեփանակերտում գտնվող «Lady Cox» վերականգնողական կենտրոնը, որը վերջին 20 տարում օգնել է ավելի քան 15.000 հիվանդի:
«ԱՄՆ Հայ դատի հանձնախումբը շնորհակալություն է հայտնում սենատոր Վան Հոլենին՝ Սենատի արտաքին օգնության օրինագծում զեկույցը ներառելու համար, որով նախապատվություն է տրվում վերականգնողական այնպիսի ծրագրերի իրականացմանը, որոնցից է Արցախի «Lady Cox» վերականգնողական կենտրոնը: Հաշմանդամություն ունեցող մարդկանց առնչությամբ խոցելի բնակչություններին ԱՄՆ-ի օգնությունը համապատասխանում է ԱՄՆ-ի արժեքներին, խոցելի բնակչություններին օգնելու հարցում մեր շահագրգռվածությանը և համամարդկային մարդու իրավունքներին մեր հանձնառությանը»,- ասել է Րաֆֆի Համբարյանը: