Թրամփը պատրաստ է մաքսատուրքեր սահմանել ներկրվող բոլոր չինական ապրանքների համար
ԱՄՆ նախագահ Դոնալդ Թրամփը հայտարարել է ներկրվող բոլոր չինական ապրանքների համար մաքսատուրքեր սահմանելու մասին, եթե դրա անհրաժեշտությունն առաջանա: Այդ մասին Թրամփն ասել է CNBC-ի հետ զրույցում:
«Ես պատրաստ եմ գնալ 500 միլիարդ դոլարի: Ես դա չեմ անում քաղաքականության համար, այլ անում եմ, որպեսզի ճիշտ բաներ անեմ մեր երկրի համար: Մենք արդեն շատ երկար ժամանակ խաբվել ենք Չինաստանի կողմից»,- ասել է նա CNBC-ին տված հարցազրույցում:
Համաձայն ԱՄՆ մարդահամարի հարցերով զբաղվող բյուրոյի տվյալների՝ 2017 թվականին ԱՄՆ չինական ապրանքների ներկրման ընդհանուր ծավալը կազմել է 505,5 միլիարդ դոլար՝ Չինաստան ամերիկյան ապրանքների արտահանման 129,9 միլիարդ դոլարի դիմաց:
Միացյալ Նահանգներն ապրիլի սկզբին հրապարակել է 1.300 չինական ապրանքից բաղկացած ցանկ, որոնց համար կարող են մաքսատուրքեր սահմանվել՝ Չինաստանի կողմից ամերիկյան արտադրանքի հեղինակային իրավունքների խախտմանն ի պատասխան:
Իր հերթին, Չինաստանի պետական խորհուրդը որոշում է կայացրել 25 տոկոսի չափով մաքսատուրքեր սահմանել ԱՄՆ-ից ներկրվող 106 անուն ապրանքի համար: