ԱԳՆ-ն կտրամադրի՞ ՀՀ-ԵՄ Ասոցացման համաձայնագրի որոշ դրույթների վերաբերյալ պատճեններ, թե կբողոքարկի դատարանի որոշումը
Հայաստանի արտաքին գործերի նախարարությունը քննարկում է Վարչական դատարանի՝ հուլիսի 10-ին որոշումը բողոքարկելու հարցը, որով գերատեսչությունը պարտավորվում է «Իրազեկ Քաղաքացիների միավորում» ՀԿ-ին տրամադրել Հայաստան-ԵՄ Ասոցացման ու խորը և համապարփակ առևտրի համաձայնագրի սակագնային կարգավորումներին վերաբերվող դրույթների լուսապատճենները:
Դեռևս 2014թ. դեկտեմբերի 20-ին «Իրազեկ Քաղաքացիների միավորում» ՀԿ-ն դիմել էր ԱԳՆ-ին՝ պահանջելով իրեն տրամադրել համաձայնագրի լուսապատճենները: Այդ ժամանակ Արտգործնախարարությունը մերժել էր տրամադրել նշված նյութերը՝ պատճառաբանելով, որ այն գաղտնագրված է։ ՀԿ-ն դիմել էր դատարան և բավարարել հայցը:
Ի պատասխան Tert.am-ի գրավոր հարցմանը, թե արդյոք ԱԳՆ-ն տրամադրելո՞ւ է պատճենները, թե՞ բողոքարկելու է դատարանի վճիռը, ԱԳՆ լրատվության և հանրային դիվանագիտության վարչությունից պատասխանել են, որ վերաքննիչ վարչական դատարան բողոքարկելու կամ այն կատարելու վերաբերյալ հարցը քննարկման փուլում է և 1 ամսվա ընթացքում, ինչպես նախատեսված է վարչական դատավարության օրենսգրքով, կընդունվի համապատասխան որոշում վճիռը բողոքարկելու կամ կատարելու վերաբերյալ:
ԱԳՆ-ին ուղարկված հարցման պատասխանն ամբողջությամբ ներկայացնում ենք ստորև.
«Վարչական դատավարության օրենսգրքի 127 հոդվածի 1-ին մասի համաձայն՝ «Վարչական դատարանի` գործն ըստ էության լուծող դատական ակտերն օրինական ուժի մեջ են մտնում հրապարակման պահից մեկ ամիս հետո, եթե այլ բան նախատեսված չէ սույն օրենսգրքով»:
ՀՀ վարչական դատարանը թիվ ՎԴ/0214/05/15 վարչական գործով՝ ըստ հայցի «Իրազեկ քաղաքացիների միավորում» խորհրդատվական հասարակական կազմակերպության ընդդեմ ՀՀ արտաքին գործերի նախարարության` Հայաստան-ԵՄ Ասոցացման և խորը ու համապարփակ առևտրի համաձայնագրի սակագնային կարգավորումներին վերաբերող դրույթների լուսապատճենները տրամադրելուն պարտավորեցնելու պահանջի մասին, 10.07.2018թ. վճռել է պարտավորեցնել ՀՀ արտաքին գործերի նախարարությանը «Իրազեկ քաղաքացիների միավորում» խորհրդատվական հասարակական կազմակերպությանը տրամադրելու Հայաստան-ԵՄ Ասոցացման և խորը ու համապարփակ առևտրի համաձայնագրի սակագնային կարգավորումներին վերաբերող դրույթների լուսապատճենները: Թիվ ՎԴ/0214/05/15 վարչական գործով վճիռն օրինական ուժի մեջ է մտնում հրապարակման պահից մեկ ամիս հետո և նույն ժամկետում կարող է բողոքարկվել ՀՀ վերաքննիչ վարչական դատարան:
Ներկայումս թիվ ՎԴ/0214/05/15 վարչական գործով 10.07.2018թ. կայացված վճիռը ՀՀ վերաքննիչ վարչական դատարան բողոքարկելու կամ այն կատարելու վերաբերյալ հարցը քննարկման փուլում է և ՀՀ վարչական դատավարության օրենսգրքով սահմանված ժամկետում (մեկ ամիս) կընդունվի համապատասխան որոշում վճիռը բողոքարկելու կամ կատարելու վերաբերյալ»: