Մեդվեդևի խոսնակը «վախկոտ ծաղրածու» է անվանել Սաակաշվիլիին
Ռուսաստանի վարչապետ Դմիտրի Մեդվեդևի մամուլի խոսնակ Նատալիա Տիմակովան մեկնաբանել է Վրաստանի նախկին նախագահ, Ուկրաինայի Օդեսայի նահանգի նախկին ղեկավար Միխեիլ Սաակաշվիլիի հայտարարությունները Մեդվեդևի վերաբերյալ՝ անվանելով Սաակաշվիլիին «վախկոտ ծաղրածու»։
«Эхо Москвы» ռադիոկայանին տված հարցազրույցում Տիմակովան նշել է, որ ՌԴ վարչապետի մասին Սաակաշվիլիի հնչեցրած բոլոր խոսքերը «սկզբից մինչև վերջ սուտ են»։
Մեդվեդևի խոսնակը նաև ասել է, որ իմաստ չի տեսնում մեկնաբանել «ակնհայոտորեն հոգեպես անառողջ մեկի զառանցանքը», և ում հանդեպ հայտարարված է միջազգային հետախոզում հենց իր իսկ երկրի կողմից, և ով խայտառակ կերպով լքել է մեկ այլ երկիր։
Նշենք, որ ավելի վաղ նույն ռադիոկայանին տված հարցազրույցում Սաակաշվիլին պատմել էր Մեդվեդևի հետ իր շփման փորձի մասին՝ նշելով, որ նա իսկական «ոչնչություն է»։
«Մեդվեդևը․․․Դե, նա, իհարկե, իսկական ոչնչություն է։ Որովհետև ես փորձեցի նրա հետ կապվեմ հեռախոսով։ Եվ սկզբում ես վազում էի նրա ետևից Աստանայում։ Եվ նա ինձ հայտնեց պատերազմի մասին ունեցած ծրագրերի մասին Ղազախստանի նախագահ Նորսուլթան Նազարբաևի կազմակերպած դիսկոտեկի ժամանակ։ Եվ հետո փախավ զուգարան, որ ես չշարունակեմ խոսակցությունը», - ասել էր Սաակաշվիլին։
Նա նաև հայտարարել էր, որ ՌԴ վարչապետը խոստովանել է, որ նախագահության օրոք որևէ հարց ինքնուրույն չի լուծել։
«Մեդվեդևը պարզապես զրո է։ Ես կարծում էի, որ շփվում եմ ՌԴ նախագահի հետ, սակայն պարզվեց, որ շփվում եմ մի մարդու հետ, ով ուղղակի ոչ մի տեսակի է։ Նա ինքն ինձ ասած․ «Դու գիտես՝ ես չեմ որոշումները կայացնողը, իսկ այնտեղ՝ Մոսկվայում, ժանրի օրենքներն այլ են»։ Սա հենց նրա խոսքն է», - պատմել էր Վրաստանի նախկին նախագահը։