Հայաստանն ոչ միայն սիրելու, այլև ապրելու հայրենիք է. վարչապետը՝ «Քայլ դեպի տուն» ծրագրի մասնակիցներին
Երազ իմ երկիր հայրենի տողն, այս արտահայտությունը շատ երկար է ասվել, շատ երգերի ու գրվածքների մեջ է եղել, ընդ որում, այդ հայրենիքի մասին երազել են թե՛ հայրենիքի ներսում, թե՛ Հայաստանից դուրս:
Այսօր «Քայլ դեպի տուն» ծրագրի փակման արարողությունը նման հայտարարություն արեց ՀՀ վարչապետ Նիկոլ Փաշինյանը: Նա շեշտեց՝ ՀՀ-ում գտնվող հայերի համար այդ երազն արդեն իրականություն է, իսկ հիմա ժամանակն է, որ այս երազն իրականություն դառնա արտերկրում ապրող մեր հայրենակիցների համար:
«Ես ուզում եմ, որ դուք այստեղից ձեր միջավայր տանենք ձեր ծնողների, ձեր երեխաների Հայաստան վերադառնալու սերմը, ՀՀ վերադառնալու անհրաժեշտությունն ու գիտակցությունը, սերը, քաղաքացիությունը:
Ես համարում եմ, որ յուրաքանչյուր հայ ՀՀ քաղաքացի է, պատիվ ունեմ ձեզ դիմել՝ որպես սիրելի հայրենակիցներ, ՀՀ հպարտ քաղաքացիներ: Մեր ավետյաց երկիրն իրականություն դարձնելու ժամանակը եկել է, և շատ կարևոր է, որ ձեզանից յուրաքանչյուրի, Սփյուռքում ապրող յուրաքանչյուր ընտանիքում խոսվի ՀՀ վերադառնալու գաղափարի ու անհրաժեշտության մասին»,- ասաց Նիկոլ Փաշինյանը:
Վարչապետը, դիմելով ծրագրի մասնակիցներին, հայտարարեց, որ եթե ոչ նրանց ծնողներն, ապա իրենք, եթե ոչ իրենք, ապա իրենց երեխաները պետք է, անպայման, վերադառնան հայրենիք:
«Սփյուռքի նախարարն ասաց, որ Հայաստանը սիրելու հայրենիք է, ես նաև ձեզ ուզում եմ ասել, որ Հայաստանն ապրելու հայրենիք է: Սա մի երկիր է, որտեղ պետք է ապրել, զարգանալ, ստեղծագործել, հարստանալ և հարստացնել՝ գաղափարներով, սիրով, էմոցիաներով: Համոզված եմ, որ մենք այսօր իրար աչքերի մեջ նայելով, իրար սիրելով՝ ավելի ենք հզորանում: Եվ ուրեմն կեցցե ազատությունը, կեցցե ՀՀ-ն, կեցցենք մենք ու մեր երեխաներն, այդ թվում դուք ու ձեր երեխաները, որ ապրելու ենք ազատ ու երջանիկ Հայաստանում: Կեցցե հայ ժողովուրդը՝ ՀՀ-ում և Սփյուռքում, կեցցե դուխով հայ ժողովուրդը»,- եզրափակեց Նիկոլ Փաշինյանը: