ԱՄՆ-ը սպառնում է պատժամիջոցներ սահմանել Հնդկաստանի դեմ ՌԴ-ից զենք գնելու դեպքում
ԱՄՆ-ը անհանգստացած է Հնդկաստանի՝ Ռուսաստանից զենք գնելու մտադրությամբ և չի բացառում դրանով պայմանավորված պատժամիջոցների սահմանումը: Այս մասին, ինչպես գրում է РИА Новости-ն, հայտարարել է ԱՄՆ պաշտպանության նախարարի Ասիա-խաղաղօվկիանոսյան տարածաշրջանի հարցերով օգնական Ռենդալ Շրայվերը:
Վաշինգտոնի «Հանուն միջազգային խաղաղության Քարնեգի հիմնադրամում» ելույթ ունենալիս Շրայվերը նշել է, որ չի կարող երաշխավորել Հնդկաստանին, որ «Պատժամիջոցների միջոցով Ամերիկայի հակառակորդներին հակազդելու մասին» (CAATSA) օրենքը կշրջանցի իրենց:
«Ես չեմ կարող այստեղ ասել ձեզ, որ իրենք կխուսափեն (պատժամիջոցներից – Tert.am) և որ բացառություն կարվի: Այս որոշումը պետք է նախագահը կայացնի և, եթե նա տեսնի, որ Հնդկաստանը Ռուսաստանից նոր համակարգեր ու պոտենցիալ է գնում… Չեմ կարող ասել, որ բացառություններ կարվեն»,- նշել է Պենտագոնի ղեկավարի օգնականը՝ առանձին ընգծելով, որ Միացյալ Նահանգներին անհանգստացնում է Հնդկաստանի՝ ռուսական С-400 զենիթահրթիռային համալիրներ գնելու մտադրությունը: