Հյուսիսային պողոտայում ավարտվեց «Երաժշտությունն ընդդեմ բռնության» ակցիան (լրացված, լուսանկարներ)
22:30
Երաժիշտները շարունակեցին իրենց կատարումները, իսկ ոստիկանապետն ու նախարարը հեռացան: Երաժիշտները նաև հայտարարեցին, որ ակցիան ավարտված է, իրենք ուղղակի շարունակում են երգել և նվագել:
21: 50
ՀՀ ոստիկանապետը մոտեցավ բերման ենթարկված երաժշտին՝ ասելով, որ համացանցում տպավորություն է ձևավորվել, որ նա ճիշտ է, իսկ ոստիկանները սխալ են եղել: «Տեսանյութը, որը ես տեսել եմ, կասեի, որ Դուք էլ սկզբում Ձեզ լավ չեք պահել, իրենք, որպես ոստիկաններ, նկատողություն են արել, իսկ դուք օրինական հորդորին չեք հետևել, ոչ ադեկվատ վիճակում եք եղել»,-ասաց Օսիպյանը:
Միաժամանակ, նա նշեց, որ հանրային վայրերում ալկոհոլի օգտագործումն արգելված է, սակայն այստեղ չի եկել դիտողություն անելու, այլ համոզվելու, որ ամեն ինչ կարգին է նրա հետ:
Երաժիշտ Իլյան հետաքրքրվեց, թե կարող են արդեն ազատ նվագել, ինչին ոստիկանապետը դրական պատասխանեց տվեց՝ միայն խնդրելով՝ ոչ շատ բարձր:
21:43
Հյուսիսային պողոտա, որտեղ ակցիան շարունակվում է, միջադեպի մյուս կողմ հանդիսացող երաժիշտները նվագում են, եկավ նաև ՀՀ մշակույթի նախարար Լիլիթ Մակունցը: Նա նշեց, որ իրենք էլ են կողմ այս երաժշտությանը, պատրաստվում էին հայտարարություն անել, սակայն ոստիկանությունն արդեն կեսօրին հայտարարությամբ հանդես եկավ:
Իսկ երաժիշտներից մեկն էլ, ով միջադեպի մասնակից է եղել, լրագրողներին ասաց, որ ինքն այդ օրը հարբած չի եղել, ով կասկածում է, խորհուրդ տվեց տեսանյութ նայել, ընդամենը հայկական գինի է խմել դրանից առաջ:
21:29
Երևանի Հյուսիսային պողոտայում «Երաժշտությունն ընդդեմ բռնության» խորագրով ակցիա է իրականացվում: Ուկրաինայից և Վրաստանից եկած երաժիշտների խումբ է իրականացնում ակցիան: Նշենք, որ սա պատասխան է պողոտայի բնակիչների այն հայտարարություններին, թե երաժիշտները խանգարում են իրենց անդորրը, ինչպես նաև տեղի ունեցած բռնության միջադեպին:
Հիշեցնենք, որ հրապարակախոս Վահրամ Մարտիրոսյանը այս մասին ֆեյսբուքյան գրառում էր արել, նախ միջադեպից տեսանյութ հրապարակել. «Երկու օր առաջ ոստիկանները արգելում էին նվագել ուկրաինացի ու վրացի երաժիշտներին, որոնք սիրված արտասահմանյան երգեր էին կատարում, բավական լավ մակարդակով, բայց ոչ բարձր՝ մոտիկ պետք է կանգնեիր, որ լսեիր։ Երեւանի փոխոստիկանապետ Էդգար Պետրոսյանի ու իմ բանավեճից հետո Հյուսիսային պողոտայի երաժիշտներին հանգիստ թողեցին»,-նշել էր նա։
ՀՀ ոստիկանապետ Վալերիյ Օսիպյանն էլ նշել էր, որ իրենց բողոքներ են ստանում. «Ես այդ հարցը կարգավորել եմ այլ երկրների փորձով: Ես հանձնարարել եմ, որ մոտենան երաժիշտներին, զգուշացնեն, որ երաժշտության ձայնը բարձր չլինի և այդ ամենն իրականացնեն մինչև 23:00-ն»,- ասել էր Վալերիյ Օսիպյանը:
Ակցիայի ընթացքում այստեղ ժամանեց ինքը՝ Օսիպյանը, ով նշեց, որ եկել է համոզվելու, որ երեկվա միջադեպից հետո հիմա իրավիճակը նորմալ է. «Գտնում եմ, որ կան մարդիկ, ովքեր փորձում են ստեղծված իրավիճակում ստվեր գցել ոստիկանության վրա, բայց ոստիկանությունն իր գործառույթն է իրականացնում»,-ասաց նա:
Վերջինս հավելեց, որ ոստիկանություն է ներկայացել այն անձը, ում հետ երաժիշտները կոնֆլիկտ էին ունեցել:
«Ոստիկանությունը դեմ չէ, սակայն մենք բողոքներ ենք ստանում, արդեն ասել եմ»,-նշեց նա:
