«Հարավկովկասյան երկաթուղիներ»-ում հայտնաբերվել է մոտ 60 միլիոն դոլարի չարաշահում. Փաշինյանն այդ մասին իրազեկել է Պուտինին
«Ռուսական երկաթուղիներ» ընկերության հայկական դուստր ընկերությունում՝ «Հարավկովկասյան երկաթուղիներ»-ում, հայտնաբերվել է 60 միլիոն դոլարի չարաշահում, այդ բացահայտումների հարցում Հայաստանի կառավարությունն ունի Ռուսաստանի նախագահի ամբողջական աջակցությունը: Այդ մասին «Կոմերսանտ»-ին տված հարցազրույցում ասել է Հայաստանի վարչապետ Նիկոլ Փաշինյանը՝ խոսելով Ռուսաստանի նախագահ Վլադիմիր Պուտինի հետ բանակցությունների արդյունքների մասին:
Լրագրողի դիտարկմանն առ այն, որ Հայաստանի և Ռուսաստանի հարաբերություններում լարվածության պատճառներից մեկը նշվել են «Ռուսական երկաթուղիներ» ընկերության հայկական դուստր ընկերությունում իրականացված խուզարկությունները, Նիկոլ Փաշինյանը նշել է, որ այդ հարցին անդրադարձ է եղել Պուտինի հետ հանդիպման ժամանակ:
«Ես պատմեցի, թե ինչ է տեղի ունեցել, ինչու է տեղի ունեցել: Կարող եմ ասել, որ այդ հարցում ես, հայկական կառավարությունն ունի Ռուսաստանի նախագահի լիարժեք աջակցությունը: Որովհետև ակնհայտ է, որ Ռուսաստանի նախագահը նույնպես շատ շահագրգռված է կոռուպցիայի դեմ պայքարում: Մենք կհամագործակցենք նաև այդ ոլորտում, և այլ ոլորտներում, որպեսզի Հայաստանում գործող ռուսական ընկերություններում չլինեն չարաշահումներ: Մենք պայմանավորվեցինք, որ այն, ինչ վերաբերում է օրինականությանը, կոռուպցիայի դեմ պայքարին, ոչ մի կերպ չի կարող մեկնաբանվել որպես հակառուսական գործողություն»,- ասել է Նիկոլ Փաշինյանը:
Լրագրողի դիարկմանը, թե հաղորդվում էր, որ ձեռնարկությունը չի վճարել 19 հազար դոլարի հարկեր, Նիկոլ Փաշինյանը նշել է, որ դա այդպես չէ:
«Այնտեղ, իմ նախնական տեղեկություններով, հայտնաբերվել են մոտ 60 միլիոն դոլարի չարաշահումներ»,- ասել է Նիկոլ Փաշինյանը՝ հավելելով, որ քննչական մարմիններն ուսումնասիրում են իրավիճակը և մոտ ապագայում կներկայացվեն պաշտոնական տեղեկություններ: Հարցին, թե արդյոք չարաշահումներն իրականացրել են միայն Հայաստանի քաղաքացիները, թե ռուսները նույնպես, ՀՀ վարչապետը նշել է, որ դա կպարզվի քննության ընթացքում:
«Կարող եմ ասել, որ մենք այդ հարցում Ռուսաստանի նախագահի հետ չունենք ոչ մի տարաձայնություն»,- ասել է նա: