Ադրբեջանի զինուժը գնդակոծել է Հայաստանի տարածքը. armeniasputnik.am
Սեպտեմբերի 15-ի երեկոյան Ադրբեջանի զինված ուժերը գնդակոծել են Հայաստանի տարածքը Արենի գյուղի շրջանում, հակառակորդի կրակակետերը ճնշվել են պատասխան գործողություններով: Այս մասին «Sputnik Արմենիա»-ին հայտնել է ՀՀ ՊՆ մամուլի քարտուղար Արծրուն Հովհաննիսյանը:
«Իրավիճակը նման է նրան, ինչ տեղի է ունեցել Տավուշում, կրակոցներն ավելի քիչ են եղել: Կրակել են հրաձգային զենքից, բայց ի տարբերություն Տավուշի, այնտեղ գնդակները մինչև գյուղ չեն հասնում», — նշել է Հովհաննիսյանը:
Նրա խոսքով՝ սահմանի մոտ գյուղացիներին պատկանող այգիներ կան: Ինչպես Տավուշի մարզում, կետերը, որոնցից հակառակորդը կրակ է արձակել, ճնշվել են:
Ավելի վաղ հաղորդվել էր, որ ադրբեջանական զինված ուժերը կրակ է բացել Տավուշի մարզի Կոթի գյուղի ուղղությամբ, ինչի հետևանքով հրազենային վնասվածք է ստացել գյուղի բնակիչ, 1957թ. ծնված Սուրեն Սեփխանյանը: