Քանի դեռ իշխանությունները Արցախի հարցում հեղհեղուկ մոտեցումներ են ցուցաբերում, ունենալու ենք սահմանային լարվածություն. քաղաքագետ (տեսանյութ)
Քանի դեռ իշխանություններն Արցախի հարցում հեղհեղուկ մոտեցումներ են ցուցաբերում, Ադրբեջանին զսպելու ուղղությամբ չեն փորձում կիրառել դիվանգիտական ողջ պոտենցիալը, ունենալու ենք սահմանային լարվածություն: Այս մասին Tert.am-ի հետ զրույցում ասաց քաղաքագետ Հրանտ-Մելիք Շահնազարյանը:
«Մենք տեսնում ենք, որ Վիեննայի և Սանկտ Պետրբուրգի պայմանավորվածությունները, որոնք, ըստ էության, լուրջ քաղաքական ճնշում էին Ադրբեջանի վրա, մոռացվել են. որևէ մեկը չի խոսում՝ ո՛չ Մինսկի խմբի համանախագահների հայտարարություններում կան, ո՛չ պաշտոնական Երևանի հայտարարություններում: Այսինքն՝ տպավորությունն այնպիսին է, որ ամեն ինչ հիմնված է «ընտրություններից հետո կզբաղվենք» մտածելակերպի վրա, և Ադրբեջանը փորձում է ինչ-որ բան նախաձեռնել, օրակարգ փոխել, գոնե փախչել այն օրակարգից, որը նախկինում դրված էր բանակցությունների սեղանին»,-նշեց նա:
Հրանտ Մելիք-Շահնազարյանի խոսքով` Ադրբեջանը բավական երկար ժամանակ պատրաստվում է ռազմական գործողությունների վերսկսմանը, նախկին իշխանությունների գործունեության պարագայում Ալիևը բանակցային սեղանին բավականին դժվար կացության մեջ էր հայտնվել և հասկանում էր, որ քաղաքական ճանապարհով չի կարող ստանալ իր ակնկալիքների անգամ 5 տոկոսը:
«Ճնշումները բավական մեծ էին, Ադրբեջանն իր նախկին գործողությունների արդյունքում մի շարք սխալներ էր թույլ տվել. ամենամեծն ապրիլյան պատերազմն էր, որն իրենց համար ձախողում էր: Փորձում էին պատերազմի կամ իրավիճակի սրման միջոցով հասնել իրենց համար ցանկալի արդյունքների, և, ըստ էության՝ Ադրբեջանի քաղաքականության մեջ որևէ բան չի փոխվել: Մենք գիտենք, որ վերջին ամիսներին մեծաթիվ զորք է կուտակվել Արցախի սահմանի գրեթե ամբողջ երկայնքով, սպասում են, ժամանակ առ ժամանակ մեծաթիվ զորավարժություններ են անցկացնում: Պատերազմ սկսելու համար ինչ անհրաժեշտ է՝ արդեն իսկ նախապատրաստել են, զուգահեռաբար լարում են նաև իրավիճակը ՀՀ-ի հետ սահմանին` ցույց տալով, որ պատերազմի դեպքում կարող է հարված լինել նաև այս ուղղությամբ: Փորձում են ամեն ինչ անել, որ մեր ԶՈՒ մի մասը, այնուամենայնիվ, մնա այստեղ, զբաղվի սահմանների պաշտպանությամբ»,-նշեց նա:
Քաղաքագետը նշեց, որ Ադրբեջանը հիմա պատերազմ վերսկսելու հնարավորություններ տեսնում է, նկատում է, որ Հայաստանը քաղաքական լուրջ խնդիրների առջև է կանգնած, ներքին զարգացումները, նոր իշխանությունները որևէ կերպ չեն կարողանում թե՛ Արևմուտքի, թե՛ ՌԴ-ի հետ եղած գործընկերային հարաբերությունները բերել նույն մակարդակի. խնդիրներ կան պաշտոնական Երևանի և այլ մայրաքաղաքների միջև:
«Զուգահեռաբար տեսնում ենք ռուս-թուրքական համագործակցության ակտիվացումը Մերձավոր Արևելքում, այսինքն՝ գլոբալ իրավիճակ փոխելու շանս է տեսել Ադրբեջանը և փորձում է օգտվել այդ շանսից. իրավիճակը սրելով՝ Ղարաբաղի հարցը բերում է տարածաշրջանային այլ քաղաքական հարցերի օրակարգ` լավ հասկանալով, որ ունի Թուրքիայի աջակցությունը, որ կան ՀՀ ներքին և արտաքին խնդիրները»,-նշեց նա:
Հրանտ Մելիք-Շահնազարյանը համաձայն չէ այն պնդման հետ, թե Նիկոլ Փաշինանը ծանր ժառանգություն է ստացել Արցախյան հարցում:
«Ինձ համար Նիկոլ Փաշինյանի խոսքերը վստահություն չեն ներշնչում: Ասելով, որ բանակցվել է հողեր հանձնելու շուրջ՝ նա չափազանցնում է, որովհետև հակառակը, հողեր հանձնելու շուրջ բանակցություններ տեղի չեն ունեցել, այս հարցերը բերել և ներքաղաքական շահարկման առարկա դարձնելն անընդունելի է, այնպես չէ, որ ծանր ժառանգություն է ստացել, հակառակը, Ադրբեջանն ինքն էր բավականին դժվար կացության մեջ հայտնվել բանակցությունների արդյունքում և Ալիևը ինքն անգամ խոստովանել է դա՝ ասելով, որ իր վրա ճնշում են գործադրում Արցախի անկախությունը ճանաչելու համար»,-շեշտեց նա:
Մանրամասները` տեսանյութում: