Բացառված չէ` վարչապետի համար ԱԺ-ի վրա ժողովրդային ճնշման անհրաժեշտություն զգացվի, իսկ ԱԺ դարպասներն ու այգին բաց պահելը կբազմապատկի այդ ճնշումը. Մ Հայրապետյան
Tert.am- ի հետ զրույցում Պահպանողական կուսակցության նախագահ Միքայել Հայրապետյանն անդրադարձել է ԱԺ դռները քաղաքացիների համար բաց պահելու Նիկոլ Փաշինյանի հայտարարությանը: Միքայել Հայրապետյանը նշեց, որ սա ոչ միայն քաղաքական, այլև քաղաքակրթական ենթատեքստ ունի:
-Բաղրամյան 26–ի դռները, իր այգով, արդեն բաց են քաղաքացիների համար, Նիկոլ Փաշինյանը խոսել է նաև ԱԺ դռները բացելու մասին: Այս նախաձեռնությունը ձեր կարծիքով, ունի՞ նաև քաղաքական ենթատեքստ:
-Եթե հաջողվի հանրային մտածողության ժողովրդավարացմանը միտված՝ վարչապետի այդ որոշումը զուգորդել անվտանգության բարձր մակարդակով, ինչի մեջ այնքան էլ լիահույս չեմ, ապա արձանագրած կլինենք թավշյա հեղափոխության ևս մի կարևոր նվաճում: Այսինքն, ավելին՝ սա ոչ միայն քաղաքական, այլև քաղաքակրթական ենթատեքստ ունի: Երևանի իշխանական թիվ մեկ շենքը կդառնա, ասենք, Պրահայի իշխանական թիվ մեկ շենքի նման: Պարոն վարչապետն այս քայլով անջատվում է այդ շենքերը ժամանակին զբաղեցրած թե՛ խորհրդային, թե՛ հետխորհրդային հայ ղեկավարներից: Տա Աստված, որ սա եզակի քայլ չլինի դեպի նոր մտածողություն և վարքականոններ:
-Այս ճանապարհով արդյո՞ք իշխանությունը փորձում է նաև անհարմար իրավիճակի մեջ գցել նախկին իշխանություններին, որոնց ներկայացուցիչներից շատերը խուսափում էին քաղաքացիների հետ շփումներից, օրինակ՝ հեղափոխության օրերին տարբեր ճանապարհներով հասնում էին ԱԺ, պատսպարվում քաղաքացիներից այնտեղ: Արդյո՞ք քաղաքացիների ուղիղ ճնշումն այս ճանապարհով կավելանա տարբեր քվեարկությունների ժամանակ, այդ թվում՝ առաջարկվող սահմանադրական փոփոխությունների վերաբերյալ:
-Իրավացի եք. առաջիկայում բացառված չէ, որ վարչապետի համար ԱԺ-ի վրա ժողովրդային ճնշման անհրաժեշտություն զգացվի, իսկ ԱԺ դարպասներն ու այգին բաց պահելը կբազմապատկի այդ ճնշումը, որը կարող է հանգեցնել թե՛ ցանկալի որոշումների ընդունման, թե՛ բարեփոխումների: Ինչ վերաբերում է սահմանադրական փոփոխություններին, ապա այստեղ փոքր-ինչ վերապահում է պետք ունենալ: Անկախության տարիներին մենք ունեցանք երկրի չորս ղեկավար: Առաջինի օրոք ընդունվեց Սահմանադրությունը, մյուս երկուսը ձևափոխումներ մտցրին՝ աշխարհի և մեր քաղաքացիների աչքին անլրջացնելով հաստատուն արժեքներ ընդունելու մեր պետական կարողունակությունը: Չէի կամենա, որ նույն ճանապարհով գնար նաև պարոն Նիկոլ Փաշինյանը. այլ ձևեր է պետք փնտրել և առավելագույն լրջությամբ մոտենալ հիմնական փաստաթղթին:
- Նիկոլ Փաշինյանը և ԱԱԾ պետը, մեկ անգամ չէ, որ խոսել են իրենց անվտանգության հետ կապված հարցերից, հիմա բացում են պետական հաստատությունների դռները, սա վտանգ չի՞ պարունակում, «Հոկտեմբերի 27-ը»՝ օրինակ:
- Վտանգներ, անշուշտ, կան: Բայց վտանգները չեզոքացնել ու կանխարգելել է պետք, ոչ թե դրանց պատճառով արգելափակել մեր ժողովրդավարացման ընթացքը: Այնպես չէ, որ նախորդ իշխանությունների օրոք փակ դռների շնորհիվ դրանք ապահովված էին: Ինքս դեռևս խորհրդային իշխանության մայրամուտին մասնակից եմ եղել «Զվարթնոց» օդանավակայան մուտքին, բոլորս ենք ականատես եղել 1996թ. ԱԺ շենքի գրավմանն ու ղեկավարության ինքնադատաստանին, հոկտեմբերի 27-ի պետական ողբերգությանը, իսկ բոլորովին վերջերս՝ Նիկոլ Փաշինյանի առաջնորդությամբ ցուցարարների կողմից ռադիոտուն ներխուժելուն: Այնպես որ, խնդիրը նոր քաղաքացու և լուրջ պետականության ծնունդն է, ինչին պետք է հուսալ և սատարել: