Ընտրությունը քաղաքականացվեց և գնաց վարչապետին սատարելու ուղղությամբ. նա խնդիր դրեց, որ այս ընտրություններն իր վստահության քվեն են․ Մ. Մանուկյան
Քվեարկել եմ հանուն երևանցու, հանուն մեր երիտասարդության, հանուն բարեկեցիկ Երևանի, կանաչապատ Երևանի, հանուն մեր ժողովրդի ու երևանցու միասնականության։ Այսօր լրագրողների հետ զրույցում նման հայտարարություն արեց Երևանի ավագանու ընտրությանը մասնակցող ՀՅԴ-ի՝ քաղաքապետի թեկնածու Միքայել Մանուկյանը, որը քվեարկության էր եկել 9/45 ընտրատեղամասում։ Նա նշեց, որ այսօր քաղաքացին բարձր գիտակցություն ունի և կքվեարկի խղճի մտոք։ Մանուկյանը հավելեց, որ քարոզարշավի ժամանակ իրենց քաղաքական ուժի դեմ ոչինչ չի լինի։
«Ճնշումներ չեն եղել, բայց ի սկզբանե թիրախավորումներ եղել են, թե որ քաղաքական ուժի կողմից, հայտի չէ։ Ի սկզբանե իմ անձի հետ կապված պատմություններ հիշեցին, որոնք ինձ հետ բացարձակ կապ չունեն։ Մի պահ որոշ տեղեր գրեցին, թե ես ընտրապայքարից դուրս եմ եկել, ու նման մանր-մունր բաներ»,- ասաց նա։
Միքայել Մանուկյանը, խոսելով քարոզարշավի մասին, նշեց, թե վարչապետ Նիկոլ Փաշինյանի՝ քարոզարշավին ակտիվ մասնակցությունը շեղեց ընտրության իմաստն ու ընթացքը։
«Քաղաքականացվեց ընտրությունը և գնաց դեպի ավելի վարչապետին սատարելու ուղղությամբ։ Վարչապետը խնդիր դրեց, որ այս ընտրություններն իր վստահության քվեն են։ Եթե խոսում ենք, որ վարչական լծակ չպետք է կիրառենք, արդյո՞ք վարչական լծակի կիրառում չէ վարչապետի այդ մասշտաբի մասնակցությունն ընտրությանը»,- շարունակեց Մանուկյանը։
Ինչ վերաբերում է ընտրակեղծիքներին, ընտրակաշառքներին, ՀՅԴ-ի՝ քաղաքապետի թեկնածուն նկատեց, որ խոսակցություններ եղել են։
«Բայց ինչ որ երեկ կատարվեց, սխալ էր։ Գիտեք, ըստ հավաստի տեղեկությունների՝ ոստիկանությունը չի կարող այդպիսի գործողություններ կատարել, մի քիչ ավելի պրոֆեսիոնալ պետք է լինի։ Ի վերջո, կուսակցության գրասենյակ է, և 80 հոգով շրջապատել են ու վերջում ասել, որ ոչինչ չգտանք, ճիշտ չէ»,- ընդգծեց Միքայել Մանուկյանը։
ՀՅԴ-ի՝ քաղաքապետի թեկնածուն հավելեց, որ իրենց չհաղթելու պարագայում էլ, եթե իրենք ստանան ավագանու մանդատ, ապա ինքը կաշխատի։